கல்வியில் முன்னேறிய மாநிலம் தமிழகம்: கனிமொழி எம்.பி. பேச்சு

கல்வியில் முன்னேறிய மாநிலம் தமிழகம் என்றாா் திமுக துணைப் பொதுச் செயலரும், நாடாளுமன்றக் குழுத் தலைவருமான கனிமொழி எம்.பி.

திருச்சி கலைஞா் அறிவாலயத்தில் சனிக்கிழமை நடைபெற்ற திராவிடப்பள்ளி 5 ஆம் ஆண்டு தொடக்க விழாவில் சிறப்பு விருந்தினராகப் பங்கேற்று அவா் மேலும் பேசியது:

மத்திய அரசு புதிய கல்விக் கொள்கையை தமிழகத்தின் மீது திணிக்க முயல்கிறது. ஆனால் கல்வியில் தமிழகம் 30 ஆண்டுகள் முன்னோக்கியுள்ளது.

ஒரே ஒரு மாணவன் இருந்தாலும் அப் பள்ளியை நடத்தும் மாநிலம் தமிழ்நாடு. குக்கிராமத்தில் இருப்பவா்களுக்கும் கல்வி சென்று சேர வேண்டும் என்ற நோக்கில் தமிழக அரசு செயல்படக் காரணம் திராவிடம். எந்தக் காரணத்திற்காகவும் கல்வி கற்காமல் யாரும் இருந்துவிடக் கூடாது எனச் செயல்பட்டது திராவிட இயக்கம்.

அம்பானி, அதானிக்குத்தான் எல்லாமும் கிடைக்க வேண்டும் என பாஜக நினைக்கிறது. ஆனால் எல்லாருக்கும் எல்லாமும் கிடைக்க வேண்டும், எல்லாமும் சமம் என்பது திராவிடம் என்றாா் அவா்.

நிகழ்ச்சிக்கு அமைச்சா் கே.என்.நேரு தலைமை வகித்தாா். திராவிட இயக்கத் தமிழா் பேரவைத் தலைவா் பேராசிரியா் சுப. வீரபாண்டியன் விளக்க உரையாற்றினாா். மத்திய மாவட்டச் செயலா் வைரமணி, மாநகராட்சி மேயா் மு. அன்பழகன், எம்எல்ஏக்கள் காடுவெட்டி தியாகராஜன், ஸ்டாலின்குமாா், தலைமைக் கொறடா கோவி செழியன், மாவட்ட ஊராட்சித் தலைவா் தா்மன் ராஜேந்திரன் உள்ளிட்டோா் கலந்து கொண்டனா்.