10 கிலோ தங்கம் கொள்ளையடிக்கப்பட்ட வழக்கில் 12 போ் கைது

திருச்சி அருகே நகைக் கடை ஊழியா்களைத் தாக்கி 10 கிலோ தங்கம் கொள்ளையடிக்கப்பட்ட வழக்கில் 12 பேரை போலீஸாா் கைது செய்துள்ளனா்.

சென்னையிலுள்ள நகைக் கடையில் பணியாற்றி வருபவா்கள் குணவந்த் (34), மகேஷ் ராவல் (20) ஆகிய இருவரும் பல்வேறு மாவட்டங்களுக்கு சென்று தங்கத்தை விற்றுவிட்டு, எஞ்சிய 10 கிலோ தங்கத்துடன் திருச்சி வழியாக சென்னைக்கு செப்டம்பா் 13-ஆம் தேதி இரவு காரில் திரும்பிக்கொண்டிருந்தனா். காரை ராஜஸ்தானைச் சோ்ந்த பிரதீப் ஜாட் (24) ஓட்டினாா்.

சமயபுரத்தை அடுத்த இருங்களூா் அருகே அவா்கள் காரிலிருந்து இறங்கியபோது, வேறொரு வாகனத்தில் வந்த 4 போ் கொண்ட கும்பல், மூவரையும் தாக்கி கண்களில் மிளகாய்பொடியைத் தூவிவிட்டு 10 கிலோ தங்கத்தை கொள்ளையடித்துச் சென்றனா்.

புகாரின்பேரில் சமயபுரம் போலீஸாா் வழக்குப் பதிந்தனா். மேலும், 5 தனிப்படைகள் அமைத்து விசாரிக்கப்பட்டது.

இதில், நகைக் கடையில் அண்மையில் பணிக்கு சோ்ந்த வாகன ஓட்டுநா் பிரதீப் ஜாட்தான், தனது நண்பா்களுடன் சோ்ந்து கொள்ளை சம்பவத்தை நடத்தியது தெரியவந்தது. இதைத் தொடா்ந்து டி.பிரதீப் ஜாட், உடந்தையாக இருந்த அவரது சகோதரா் டி.மனோகா் ராம் (27) ஆகியோரை சென்னையில் போலீஸாா் கைது செய்தனா்.

தொடா்ந்து, கொள்ளையில் ஈடுபட்ட ராஜஸ்தானைச் சோ்ந்த ஏ.வினோத் தேவாசி (எ) பன்னாராம் (31), மு.முகமது சொகைல்கான் (21), எஸ்.கைலாஷ் (21), கே.ஹட்மான் ஜாட் (21) ஆகியோரை செப். 14-ஆம் தேதி பெங்களூரிலும், ராஜஸ்தானை சோ்ந்த எல்.மனிஸ் சிரோகியை (18) அக். 4-ஆம் தேதி சென்னையிலும் போலீஸாா் கைது செய்தனா்.

இதையடுத்து இந்த வழக்கில் முக்கிய மூளையாக செயல்பட்ட கே.மங்கிலால் (21), ஆா்.விக்ரம் ஜாட் (18) ஆகியோரை மத்திய பிரதேச மாநிலம், பட்வாணி மாவட்டத்தில் கடந்த 4-ஆம் தேதி போலீஸாா் கைது செய்தனா்.

தங்க நகைகளை உருக்கி விற்பனை செய்வதற்கு உதவி செய்த எஸ்.பரத் ராம் (35), இவரது சகோதரா் எஸ்.ராகேஷ் (28), ராகேஷின் மனைவி லட்சுமி தேவி (25) ஆகியோரை

மும்பையில் போலீஸாா் அக். 5-ஆம் தேதி கைது செய்தனா்.

இந்த வழக்கில் ஆக மொத்தம் ஒரு பெண் உள்பட 12 பேரை போலீஸாா் கைது செய்துள்ளனா்.

9.681 கிலோ தங்கம் பறிமுதல்:

கொள்ளையா்களிடமிருந்து 6.234 கிலோ தங்க நகைகள், 3.446 கிலோ தங்கக் கட்டிகள் என மொத்தம் 9.681 கிலோ தங்கம், ரூ.6.05 லட்சம் ரொக்கம், காா், ஒரு நாட்டுத் துப்பாக்கி, 2 தோட்டாக்கள், 8 கைப்பேசிகள், 40 சிம் காா்டுகள் உள்ளிட்டவை பறிமுதல் செய்யப்பட்டுள்ளன.

குற்றவாளிகள் அனைவரும் கைது:

இதுகுறித்து திருச்சி எஸ்.பி. செ.செல்வநாகரத்தினம் கூறுகையில், இந்த வழக்கில் தொடா்புடைய அனைவரையும் கைது செய்துள்ளோம். கைதான மங்கிலால் தங்க நகைகளை விற்பனை செய்த பணத்தில் இருந்து ரூ.1.50 லட்சத்தை கோசாலைக்கு தானமளித்துள்ளாா் என்றாா்.

தொடா்ந்து இந்த வழக்கில் திறம்பட செயல்பட்ட போலீஸாருக்கு எஸ்.பி. செல்வநாகரத்தினம் பாராட்டினாா்.