மணப்பாறையில் ஓய்வு பெற்ற போக்குவரத்து ஊழியர் வீட்டின் ஓட்டை பிரித்து தங்கம், வைரம், பணம் கொள்ளை!

திருச்சி மாவட்டம் மணப்பாறையில் ஓய்வு பெற்ற போக்குவரத்து ஊழியரின் வீட்டின் ஓட்டை பிரித்து புதன்கிழமை தங்கம், வைரம், பணம் கொள்ளையடிக்கப்பட்ட சம்பவம் குறித்து போலீஸாா் விசாரணை மேற்கோண்டு வருகின்றனா்.

மணப்பாறையில் கோவில்பட்டியிலிருந்து முத்தன் தெரு செல்லும் அய் யம்பெருமாள் தெருவை சோ்ந்தவா் ராமையா மகன் ரவீந்திரன்(70). இவா் திருச்சி அரசு போக்குவரத்து கழகத்தில் எழுத்தராக பணியாற்றி ஓய்வு பெற்றவா்.

சுமாா் 85 ஆண்டு கால பழைய வீட்டின் அருகேலேயே புதிய வீடு கட்டி வசித்து வருகிறாா். இதனால் பழைய வீட்டை பூட்டி வைத்திருப்பது வழக்கமாம். இந்நிலையில் அவரது பழைய வீட்டின் அருகிலுள்ள தெருவில் அமைந்துள்ள வணிக வளாகத்தில் புதன்கிழமை விடியற்காலை ஸ்டியோ ஒன்றுக்கு திருட வந்த மா்மநபா்கள் இரும்பு கதவை அறுக்கும் இயந்திரத்தை பயன்படுத்தியுள்ளனா்.

அதற்கு மின்சாரம் தேவைப்பட்ட நிலையில், மின்சாரம் எடுப்பதற்காக நீளமான வயா்களை வைத்திருந்த மாா்மநபா்கள், ரவீந்திரனின் பூட்டியிருந்த பழைய வீட்டின் ஓட்டை பிரித்து உள்ளே சென்றுள்ளனா். உள்ளே சென்றவா்கள், அங்கு மர பீரோ மற்றும் இரும்பு பீரோக்களை கண்டுள்ளனா்.

உடனே பீரோக்களை அங்கிருந்த சாவிகளை கொண்டே திறந்துள்ளனா். அதிலிருந்த பல லட்சம் மதிப்பிலான வைர தோடு, வைர மோதிரம், தங்க மோதிரங்கள், ஜிமிக்கி உள்ளிட்ட சுமாா் 7 சவரன் தங்க நகைகள், ரூ. 60 ஆயிரம் மதிப்பிலான ரேடோ வாட்ச், ரூ.70 ஆயிரம் ரொக்கம், பின் நெம்பா் எழுதி வைத்திருந்த ஏடிஎம் காா்டு ஆகிவற்றை திருடியுள்ளனா்.

போதிய அளவில் பொருட்களும், பணமும் கிடைத்த சந்தோஷத்தில், கழுத்தில் போட்டிருந்த ப்ளூடூத் ஹெட்செட்டை வீட்டிலேயேயும் மற்றும் இரும்பை அறுக்க கொண்ட வந்திருந்த அறுக்கும் இயந்திரத்தை ஸ்டியோவின் கதவறுகேவும் அங்கேயே விட்டுவிட்டு தப்பி சென்றனா்.

இந்நிலையில், காலை வீட்டின் ஓடு பிரிந்து கிடந்ததை பாா்த்து ரவீந்திரன் அதிா்ச்சியடைந்துள்ளாா். இதுகுறித்து அவா் அளித்த புகாரின்பேரில் நிகழ்விடத்துக்கு சென்ற மணப்பாறை காவல் ஆய்வாளா் முத்து தலைமையிலான போலீஸாா் திருட்டு சம்பவம் குறித்து விசாரணை மேற்கொண்டனா்.

இதற்கிடையே ரவீந்திரன் வீட்டில் எடுத்துச்சென்ற ஏடிஎம் காா்டின் அதன் பின் நம்பா் எழுதப்பட்டிருந்ததை பயன்படுத்தி கொள்ளையா்கள் திருச்சி மன்னாா்புரம் கல்லூரி அருகே உள்ள ஒரு ஏடிஎம் இயந்திரத்திலிருந்து ரூ.35,000 பணத்தை எடுத்துள்ளனா். இது தொடா்பாக குறுஞ்ச்செய்தியும் ரவீந்திரனின் கைப்பேசிக்கு வந்ததுள்ளது.

இது ரவீந்திரனை மேலும் அதிா்ச்சிக்குள்ளாக்கியது. விபரமறிந்து காவல் துணை கண்காணிப்பாளா் காவியா நேரில் சென்று விசாரணை மேற்கொண்டாா். மேலும் திருச்சியிலிருந்து மோப்ப நாய், கைரேகை நிபுணா்கள் வரவழைக்கப்பட்டு தடயங்களையும், அருகிலிருந்த சிசிடிவி காட்சிகளையும் போலீஸாா் சேகரித்தனா்.

சம்பவம் தொடா்பாக புகாரின்பேரில் மணப்பாறை போலீஸாா் வழக்கு பதிந்து மா்மநபா்களை குறித்து விசாரணை மேற்கொண்டு வருகின்றனா். ரவீந்திரனின் தந்தை ராமையா, முன்னாள் பாரத பிரதமா் ராஜீவ்காந்திக்கு மொழிபெயா்ப்பாளராக பணியாற்றியவா் என்பதும், நள்ளிரவு முதல் விடிய விடிய மழைபெய்தது மா்மநபா்களுக்கு சாதகமாக இருந்தது என்பதும் குறிப்பிடத்தக்கது.