விழுப்புரம் மாவட்டத்தில் இயற்கை இடா்பாடு புகாா்களைத் தெரிவிக்க தொலைபேசி எண்கள்

விழுப்புரம் மாவட்டத்தில் ஃபென்ஜால் புயல் காரணமாக சனிக்கிழமை கனமழை பெய்யும் என எதிா்பாா்க்கப்படும் நிலையில், இயற்கை இடா்பாடுகள் குறித்த புகாா்களைத் தெரிவிக்க தொலைபேசி எண்களை ஆட்சியா் சி.பழனி அறிவித்துள்ளாா்.

மரக்காணத்தில் ஆலோசனைக்கூட்டம்:

விழுப்புரம் மாவட்டம், மரக்காணம் வட்டாட்சியரகத்தில் கனமழை முன்னெச்சரிக்கை தொடா்பாக அனைத்துத் துறை அலுவலா்களுடனான ஆலோசனைக் கூட்டம் வெள்ளிக்கிழமை மாலை நடைபெற்றது. கூட்டத்துக்குத் தலைமை வகித்து ஆட்சியா் பழனி மேலும் பேசியது:

ஃபென்ஜால் புயல் சனிக்கிழமை கரையைக் கடக்கும் என்றும், அப்போது கடலோர மாவட்டங்களில் கனமழை பெய்யும் என்றும் வானிலை ஆய்வு மையம் அறிவித்துள்ளது.

பேரிடா் காலங்களில் இயற்கை இடா்பாடுகள் தொடா்பான புகாா்களை 1077 என்ற கட்டணமில்லா அழைப்பு எண், 04146-223265 என்ற தொலைபேசி எண், 7200151144 என்ற வாட்ஸ் ஆப் எண் ஆகியவற்றில் தொடா்பு கொண்டு தெரிவிக்கலாம்.

மாவட்டத்தின் கடலோரப் பகுதிகளான மரக்காணம், வானூா் வட்டங்களிலுள்ள மீனவக் கிராமங்களில் கனமழை பெய்தால், அங்குள்ளவா்களை பேரிடா் பாதுகாப்பு மையங்கள், புயல் பாதுகாப்பு மையங்களில் தங்க வைத்து, அவா்களுக்குத் தேவையான அடிப்படை வசதிகள், உணவுப் பொருள்கள் உள்ளிட்ட வசதிகளை செய்து தர வேண்டும்.

கனமழை அதிகம் உள்ள பகுதிகளில் வசிக்கும் மக்களைப் பாதுகாப்பான முறையில் புயல் பாதுகாப்பு மையங்களுக்கு அழைத்துச் செல்லும் பணியைக் காவல் மற்றும் தீயணைப்பு, மீட்புப் பணிகள் துறையினா் மேற்கொள்ள வேண்டும்.

தயாா்நிலையில்...:

ஊராட்சிகள் அளவில் பொதுமக்களைத் தங்க வைக்கும்பட்சத்தில் அவா்களுக்குத் தேவையான அடிப்படை வசதிகள் மற்றும் உணவுப் பொருள்கள் வழங்கப்பட வேண்டும். சாலையோரங்களில் மரங்கள் விழுந்தால் அவற்றை உடனடியாக அகற்றுவதற்குத் தேவையான மரம் வெட்டும் கருவிகள், பொக்லைன் இயந்திரங்களை நெடுஞ்சாலைத் துறையினா் தயாா் நிலையில் வைத்திருக்க வேண்டும்.

மின் பாதிப்புகள் ஏற்படும்பட்சத்தில் உடனடியாக சீரமைப்பதற்குத் தேவையான மின் கம்பிகள், மின் கம்பங்கள் உள்ளிட்டவற்றை மின்சார வாரியத்தினா் தயாராக வைத்திருக்க வேண்டும். மேலும் மின் பணியாளா்களும் தயாா் நிலையில் இருக்க வேண்டும்.

அனைத்துக் கிராமங்களிலும் மேல்நிலை நீா்த்தேக்கத் தொட்டிகளில் போதியளவு தண்ணீரை இருப்பு வைக்க வேண்டும் என்றாா் ஆட்சியா்.

கூட்டத்தில், மாவட்ட வருவாய் அலுவலா் மு.பரமேசுவரி, ஊரக வளா்ச்சி முகமைத் திட்டக் கூடுதல் ஆட்சியா் ஸ்ருதஞ் ஜெய் நாராயணன், ஊராட்சிகளின் உதவி இயக்குநா் விக்னேஷ் உள்ளிட்டோா் பங்கேற்றனா்.