Enable Javscript for better performance
மணிலா பயிரில் புரோடினியா புழுவைக் கட்டுப்படுத்த ஆலோசனை- Dinamani

சுடச்சுட

    

    மணிலா பயிரில் புரோடினியா புழுவைக் கட்டுப்படுத்த ஆலோசனை

    By கடலூர்,  |   Published on : 26th December 2014 02:47 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    மணிலா பயிரில் காணப்படும் புரோடினியா புழுவைக் கட்டுப்படுத்தும் முறை குறித்து வேளாண்மை உதவி இயக்குநர் பொ.ஜெயக்குமார் ஆலோசனை வழங்கியுள்ளார்.

    இதுகுறித்து அவர் வெளியிட்ட செய்திக் குறிப்பு: மணிலா பயிரில் காணப்படும் புரோடினியா புழுவின் தாய் அந்துப் பூச்சிகள் இலையின் மேல்பாகத்தில் குவியல் குவியலாக சுமார் 200 முதல் 300 வரை முட்டைகள் இடுகின்றன. முட்டையிலிருந்து வெளிவரும் இளம் புழுக்கள் பளபளப்பான பச்சை நிறத்துடன் காணப்படும்.

    இளம் புழுக்கள் 5 முதல் 6 நாள்கள் ஒரே இலைத் தொகுதியில் இருந்து கொண்டு பச்சையத்தை சுரண்டி உண்கின்றன.

    இளம் புழுக்கள் கூட்டமாக வாழ்ந்தாலும், வளர்ந்த புழுக்கள் தனித் தனியாக பிரிந்து மற்ற இலைகளுக்கு சென்று நடுநரம்பு பகுதியை விட்டுவிட்டு மீதி இலைப் பகுதியை வெட்டி உண்ணும். அதிகம் தாக்குண்ட வயல்களைப் பார்த்தால் மாடு மேய்ந்தது போன்று காட்சியளிக்கும்.

    முட்டையிலிருந்து வெளிவந்த புழு அந்துப் பூச்சியாக மாறுவதற்குள் 5 முறை தன் தோலை உரித்துக் கொள்கிறது. நான்காவதாக தோல் உரித்தவுடன் இப்புழுக்களை பூச்சிக்கொல்லி மருந்து தெளித்து கட்டுப்படுத்துவது மிகவும் கடினம். எனவே, இவற்றை அழிக்க வயிற்று நஞ்சு அல்லது நச்சுத்தீனி தயாரித்து அவற்றை உண்ணும்படி செய்ய வேண்டும்.

    மணிலா விதை விதைத்த 40-வது நாளில் (அதிக வளர்ச்சிப் பருவத்தில்) இதன் தாக்குதல் அதிகமாக இருக்கும். மேலும், ஜனவரி மாதங்களிலும் இதன் தாக்குதல் அதிகமாக இருக்கும்.

    நான்காவது தோலுரிப்பு பருவத்தில் 100 புழுக்கள் சராசரியாக 524 கிலோ இலையைத் திண்ணக்கூடியது.

    இந்த நச்சுத்தீனியை நாமே தயாரித்துக் கொள்ளலாம். இதற்கு, பச்சரிசி தவிடு 5 கிலோ, வெல்லம் 1 கி, செவின் தூள் 500 கிராம் தேவை.

    வெல்லக் கரைசலை தயார் செய்து அதனுடன் அரிசி தவிட்டை தரையில் கொட்டி வெல்லத்தையிட்டு இரண்டரக் கலக்க வேண்டும். பிறகு, நச்சு மருந்து செவின் தூளை நன்றாக கிளற வேண்டும். சிறிது சிறிதாக நீர் ஊற்றி பிசைய வேண்டும்.

    உருண்டை பிடிக்கும் பதத்தில் அதனைக் கொண்டு சிறிய சிறிய உருண்டைகளாக பிடித்து வயல் ஓரங்களிலும், நடுவிலும், ஆங்காங்கே மாலை நேரத்தில் போட்டுவைக்க வேண்டும்.

    மறுநாள் காலை இதனை உண்டு புழுக்கள் ஆங்காங்கே செத்துக் கிடப்பதைக் காணலாம். எனவே, மணிலாவில் நச்சுத்தீனியை இட்டு புரோடினியா புழுவை கட்டுப்படுத்தலாம் எனத் தெரிவித்துள்ளார்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai