வாடகை பாக்கி செலுத்தாத கடைகளுக்கு சீல்: நகராட்சி நிர்வாகம் நடவடிக்கை

கடலூரில் வாடகை பாக்கி செலுத்தாத 2 கடைகளுக்கு சீல் வைத்து நகராட்சி அதிரடி நடவடிக்கை எடுத்துள்ளது.

கடலூர் நகராட்சிக்குச் சொந்தமான பேருந்து நிலையம், சந்தைகளில் நகராட்சி நிர்வாகம் கடைகள் கட்டி வாடகைக்கு விட்டு வருகிறது. இதன்படி, பேருந்து நிலையத்தில் வாடகைக்கு விடப்பட்ட கடைகளில் 15 பேர் தொடர்ந்து வாடகை செலுத்தாமல் இருந்தனர்.

இதனையடுத்து, அவர்கள் மீது உரிய நடவடிக்கை எடுத்திட நகராட்சியின் கூட்டத்தில் தீர்மானம் நிறைவேற்றப்பட்டது. பின்னர், 15 கடைகளுக்கும் நோட்டீஸ் அளிக்கப்பட்டது.

எனினும், உரிய வாடகை பாக்கி செலுத்தாததைத் தொடர்ந்து நகராட்சி ஆணையரின் உத்தரவின் பேரில் வருவாய் அலுவலர் பி.குமார்சிங் தலைமையில் சந்தை கண்காணிப்பாளர் இளங்கோ, வருவாய் ஆய்வாளர்கள் சீனுவாசன், ரமேஷ், ஜெய்சங்கர், கணேசன் ஆகியோர் கொண்ட குழுவினர் சம்பந்தப்பட்ட கடைகளுக்குச் சென்று விசாரணை நடத்தினர்.

இதில், 13 கடைகள் தங்களது வாடகை பாக்கியில் ரூ.12.30 லட்சம் செலுத்தின. எனினும், ரூ.2.07 லட்சம் வாடகை பாக்கி செலுத்தாத தாட்சாயினி, ரூ.2.17 லட்சம் பாக்கி வைத்திருந்த அருணாசலம்  ஆகியோரது கடைகளை நகராட்சி அலுவலர்கள் பூட்டி சீல் வைத்தனர்.

இதேபோன்று, பான்பரி சந்தை, முதுநகர் பக்தவச்சலம் சாலை, அண்ணா சந்தை உள்ளிட்ட பகுதிகளிலும் கடைகளுக்கு பாக்கி வைத்திருப்பவர்கள் உடனடியாக வாடகை பாக்கி செலுத்த வேண்டும்.

இல்லையெனில் அவர்கள் மீது விரைவில் நடவடிக்கை எடுக்கப்படும் என்று நகராட்சி சார்பில் தெரிவிக்கப்பட்டுள்ளது.