Enable Javscript for better performance
மணல் குவாரி பாதையில் மர்மச் சாவு: இளைஞர் சடலத்தை வாங்க மறுத்து கிராம மக்கள் மறியல்- Dinamani

சுடச்சுட

    

    மணல் குவாரி பாதையில் மர்மச் சாவு: இளைஞர் சடலத்தை வாங்க மறுத்து கிராம மக்கள் மறியல்

    By  சிதம்பரம்,  |   Published on : 21st December 2017 09:29 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    அரசூர் கிராமத்தில் மணல் குவாரிக்கு செல்லும் பாதையில் மர்மமான முறையில் உயிரிழந்த இளைஞரின் சடலத்தை வாங்க மறுத்து உறவினர்கள், கிராம மக்கள் சிதம்பரத்தில் புதன்கிழமை சாலை மறியலில் ஈடுபட்டனர்.
     சிதம்பரம் அருகே உள்ள அரசூர் கிராமத்தில் மணல் குவாரி உள்ளது. இந்த கிராமத்துக்கு மணல் லாரிகள் செல்லும் பாதையில் வெள்ளூரைச் சேர்ந்த இளைஞர் ஆனந்தபிரபு (29) உடலில் காயங்களுடன் மர்மமான முறையில் செவ்வாய்க்கிழமை இறந்து கிடந்தார். இவர் அடித்துக் கொல்லப்பட்டாரா அல்லது மணல் லாரி மோதியதில் உயிரிழந்தாரா என்று கிராம மக்களுக்கு சந்தேகம் ஏற்பட்டது. இதனால், அவர்கள் அப்பகுதியில் முற்றுகையிட்டு சடலத்தை போலீஸார் கொண்டு செல்லக் கூடாது எனக் கூறியும், மணல் குவாரியை நிரந்தரமாக மூட வேண்டும் எனவும் வலியுறுத்தி போராட்டத்தில் ஈடுபட்டனர்.
     அவர்களிடம் சிதம்பரம் ஏஎஸ்பி என்.எஸ்.நிஷா, காவல் ஆய்வாளர் செபஸ்டியன், தாசில்தார் க.ஜெயந்தி ஆகியோர் பேச்சுவார்த்தை நடத்தினர். பின்னர் இளைஞரின் சடலம் உடல்கூறாய்வுக்காக சிதம்பரம் அரசு மருத்துவமனைக்கு கொண்டு செல்லப்பட்டது. இந்த நிலையில், புதன்கிழமை காலை உடல்கூறாய்வு நடைபெற்றது. ஆனால், இளைஞரின் சடலத்தை வாங்க மறுத்து கிராம மக்களும், உறவினர்களும் சிதம்பரம் அரசு மருத்துவமனை முன் சாலை மறியல் போராட்டத்தில் ஈடுபட்டனர். அவர்களிடம் போலீஸார் பேச்சுவார்த்தை நடத்தினர். அப்போது, இளைஞரின் மரணத்தை சந்தேக மரணம் என வழக்குப் பதிவு செய்ய வேண்டுமென கிராம மக்கள் வலியுறுத்தினர்.
     பின்னர் கிராம மக்கள், விடுதலைச் சிறுத்தைகள் கட்சியின் மாவட்டச் செயலர் பால.அறவாழி, பெரு.திருவரசு, வ.க.செல்லப்பன், கோவி.பாவாணன், மார்க்சிஸ்ட் கம்யூனிஸ்ட் கட்சி பி.கற்பனைச்செல்வன் ஆகியோர் சிதம்பரம் கோட்டாட்சியர் அலுவலகத்துக்குச் சென்று மனு அளித்தனர். இளைஞர் மீது மோதிய மணல் லாரியை பறிமுதல் செய்ய வேண்டும், லாரி டிரைவரைக் கைது செய்ய வேண்டும், மணல் குவாரியை மூட வேண்டும், சந்தேக மரணம் என வழக்குப் பதிவு செய்ய வேண்டும் என வலியுறுத்தினர். இதுகுறித்து உரிய நடவடிக்கை எடுப்பதாக கோட்டாட்சியர் உறுதி அளித்ததை அடுத்து இளைஞரின் சடலத்தை உறவினர்கள் பெற்றுச் சென்றனர்.
     
     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai