சுடச்சுட

    

    சாதி மறுப்பு திருமணம் செய்வோருக்காக தாற்காலிக தங்கும் விடுதி அமைக்க வேண்டும்: ஜனநாயக மாதர் சங்கம்

    By  கடலூர்,  |   Published on : 22nd December 2017 08:43 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    சாதி மறுப்பு திருமணம் செய்வோர் தாற்காலிகமாக தங்க வசதியாக நீதிமன்ற உத்தரவின்படி விடுதி அமைக்கப்பட வேண்டுமென அனைத்திந்திய ஜனநாயக மாதர் சங்கம் வலியுறுத்தியது.
     இந்தச் சங்கத்தின் மாநிலப் பொதுச் செயலர் பி.சுகந்தி வியாழக்கிழமை கடலூரில் செய்தியாளர்களிடம் கூறியதாவது: நெய்வேலி சார்பு நீதிமன்ற நீதிபதி குறித்து எங்களது இயக்கத்தின் மாநிலத் தலைவர் பெயரில் பொய்யான கையொப்பம் இடப்பட்டு புகார் அனுப்பிவைக்கப்பட்டுள்ளது.
     இந்தப் புகாருக்கும், ஜனநாயக மாதர் சங்கத்துக்கும் எந்தத் தொடர்பும் இல்லை. எனவே, சங்கம் சார்பில் மாவட்ட முதன்மை நீதிபதி, மாவட்டக் காவல் கண்காணிப்பாளர் ஆகியோரிடம் புகார் தெரிவிக்க உள்ளோம். உயர்நீதிமன்ற நீதிபதியிடமும் புகார் தெரிவிக்கப்பட்டுள்ளது. சங்கத்தின் பெயரை தவறாகப் பயன்படுத்தியவர்களுக்கு கண்டனம் தெரிவித்துக் கொள்கிறோம்.
     தமிழகத்தில் பெண்கள், குழந்தைகளுக்கு எதிரான வன்முறைகள் அதிகரித்துள்ளன.
     இதனை விசாரிக்கவேண்டிய மாநில மகளிர் ஆணையத்தின் தலைவர், உறுப்பினர் பதவிகள் கடந்த ஒன்றரை ஆண்டுகளுக்கும் மேலாக காலியாக உள்ளன. உடுமலைப்பேட்டை சங்கரின் கொலை சாதிய ஆணவப் படுகொலை என தொடர்ந்து கூறி வந்தோம். தற்போது வந்துள்ள தீர்ப்பும் அதனை உறுதிப்படுத்தி உள்ளது. ஏற்கெனவே மற்றொரு தீர்ப்பில் நீதிமன்றம் பிறப்பித்த உத்தரவுப்படி, சாதி மறுப்பு திருமணம் செய்வோர் தாற்காலிகமாக தங்கும் வகையில் மாவட்டந்தோறும் முகாம் அமைக்க வேண்டும். மாவட்டக் காவல் கண்காணிப்பாளர்கள் தலைமையில் இந்த முகாம் அமைக்கப்பட வேண்டுமென நீதிமன்றம் பிறப்பித்த உத்தரவானது எந்த மாவட்டத்திலும் செயல்பாட்டுக்கு வரவில்லை. இந்த தீர்ப்பை நடைமுறைப்படுத்த வேண்டும்.
     தமிழகத்தில் 1,330 மைக்ரோ பைனான்ஸ் நிறுவனங்கள் மகளிர் சுயஉதவிக் குழுவினரிடம் கந்து வட்டி போல அதிக வட்டி வசூலித்து வருவதை தமிழக அரசு தடுத்து நிறுத்த வேண்டும் என்றார் அவர்.
     சங்கத்தின் மாநிலத் தலைவர் எஸ்.வாலண்டினா, மாநில புரவலர் பா.ஜான்சிராணி, மாவட்டச் செயலர் பி.தேன்மொழி, மாவட்டத் தலைவர் முத்துலட்சுமி நிர்வாகிகள் மேரி, சிவகாமி, சாந்தகுமாரி ஆகியோர் உடனிருந்தனர்.
     
     
     

    Thirumana Porutham
    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai