சுடச்சுட

    

    இந்தியாவில் அடுத்த 5 ஆண்டுகளில் தனி நபர் மின் நுகர்வு இரு மடங்காக அதிகரிக்கும்: என்எல்சி இந்தியா தலைவர்

    By DIN  |   Published on : 27th December 2017 07:06 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    இந்தியாவில் அடுத்த 5 ஆண்டுகளில் தனி நபர் மின் நுகர்வு இரு மடங்காக அதிகரிக்க வாய்ப்புள்ளதாக  என்எல்சி இந்தியா நிறுவனத் தலைவர் சரத்குமார் ஆச்சார்யா தெரிவித்தார்.
    பொறியியல் துறையின் நவீன வளர்ச்சியை அனைவரும் அறிந்துகொள்ளும் வகையில் ஒவ்வோர் ஆண்டும் இந்தியப் பொறியியல் மாநாட்டை இந்தியப் பொறியாளர் கழகம் முக்கிய நகரங்களில் நடத்தி வருகிறது. அதன்படி, "பொறியியல் துறையில் புதிய கண்டுபிடிப்புகளும், அதனைச் செயல்படுத்தும் வியூகங்களும்' என்ற தலைப்பில் சென்னையில் கடந்த 21 முதல் 23-ஆம் தேதி வரை மாநாடு நடைபெற்றது. இதில், குடியரசுத் தலைவர் ராம்நாத் கோவிந்த் உள்ளிட்ட முக்கியப் பிரமுகர்கள் பங்கேற்று பேசினர்.
    மாநாட்டில் சிறப்பு அழைப்பாளராகக் கலந்துகொண்ட என்எல்சி இந்தியா நிறுவனத் தலைவர் சரத்குமார் ஆச்சார்யா, "இந்திய மின் துறையின் இன்றைய நிலையும், எதிர்காலத்தில் சந்திக்கவுள்ள வளர்ச்சியும்' என்ற தலைப்பில் ஆற்றிய சிறப்புரை: இந்தியாவில் தனி நபர் மின் நுகர்வு 1,101 யூனிட்டாக உள்ளது. இந்திய மக்களின் வாழ்க்கைத் தரம் மேம்பட்டு வருவதால் அடுத்த 5 ஆண்டுகளில் தனிநபர் மின் நுகர்வு இரு மடங்காக அதிகரிக்க வாய்ப்புள்ளது. அனைவருக்கும் தடையின்றி மின் சக்தி வழங்க வேண்டும் என்ற இலக்குடன் பணியாற்றி வருவதால், நமது நாட்டின் தற்போதைய மொத்த மின் உற்பத்தி அளவான மணிக்கு 33.11 கோடி யூனிட் என்பதை (3, 31,118 மெ.வா) அடுத்த 5 ஆண்டுகளில் 46.89 கோடி யூனிட்டாக (4,68,939 மெ.வா) அதிகரிக்க வேண்டும். இதற்காக சுமார் 1,37,821 மெகாவாட் அளவுக்கு புதிய மின் திட்டங்கள் தொடங்கப்பட வேண்டும். 
    இதில் சுமார் 65 ஆயிரம் மெகாவாட் மின்சாரம் காற்றாலை, சூரிய ஒளி போன்றவை மூலமாகவும், சுமார் 50 ஆயிரம் மெகாவாட் மின்சாரம் அனல் மின் நிலையங்கள் மூலமாகவும் உற்பத்தி செய்ய திட்டமிடப்பட்டுள்ளது.  அனல் மின் நிலையங்களிலிருந்து வெளியேற்றப்படும் வாயுவில் டி-சல்பியூரிபிகேஷன் என்ற கந்தக வாயு நீக்குதல், டி-நாக்ஸ் என்ற நைட்ரஜன் ஆக்ஸைடை நீக்குதல் போன்ற வசதிகள் இந்திய அனல் மின் நிலையங்களில் தற்போது ஏற்படுத்தப்பட்டு வருகிறது என்றார் அவர். 
    மாநாட்டில் தமிழக அமைச்சர் கே.பாண்டியராஜன், சென்னை, இந்திய தொழில்நுட்பக் கழக இயக்குநர் பாஸ்கர் ராமமூர்த்தி, இந்திய விண்வெளி ஆராய்ச்சிக் கழக இயக்குநர் கே.சிவன் ஆகியோர் பல்வேறு கருத்துக்களில் சிறப்புரையாற்றினர். 
    மாநாட்டின் தொடக்க விழாவில், உயர் தனிச் சிறப்புடன் திகழும் நிறுவனத்துக்கான விருது என்எல்சி இந்தியா நிறுவனத்துக்கு வழங்கப்பட்டது.
    மாநாட்டில், சுமார் 800 பொறியாளர்கள், தொழில்நுட்ப வல்லுநர்கள் கலந்துகொண்டனர்.
     

    Thirumana Porutham
    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai