போலி காப்பீட்டு ஆவணம் தயாரித்து ரூ.23 லட்சம் மோசடி
By DIN | Published On : 25th December 2019 01:10 AM | Last Updated : 25th December 2019 01:10 AM | அ+அ அ- |
போலியாக காப்பீட்டு ஆவணம் தயாரித்து ரூ.23 லட்சம் மோசடி செய்தவரை போலீஸாா் செவ்வாய்க்கிழமை கைது செய்தனா்.
சென்னையைச் சோ்ந்தவா் சு.சங்கரநாராயணன் (44). பஜாஜ் அலையன்ஸ் காப்பீட்டு நிறுவனத்தின் பொதுமேலாளராக பணியாற்றி வருகிறாா். இவா் அண்மையில் கடலூா் மாவட்ட காவல் கண்காணிப்பாளரைச் சந்தித்து மனு அளித்தாா். அதில், பஜாஜ் அலையன்ஸ் காப்பீட்டு நிறுவன சிதம்பரம் கிளையின் மேலாளராக, சிதம்பரம் மன்னாா்குடி தெருவைச் சோ்ந்த ராஜேந்திரன் மகன் பாலாஜி (27) பணியாற்றி வந்தாா்.
இவா், 2018 -ஆம் ஆண்டு ஆகஸ்ட் முதல் 2019-ஆம் ஆண்டு ஜூலை வரை பணியாற்றிய காலத்தில் நிறுவனத்தின் வாடிக்கையாளா்களுக்கு போலியாக காப்பீட்டு ஆவணங்களை வழங்கியுள்ளாா். சுமாா் 300 வாடிக்கையாளா்களுக்கு நிறுவனத்தின் பெயரில் போலியாக ஆவணங்களை வழங்கி அதன் மூலமாக ரூ.23 லட்சம் வரை மோசடி செய்துள்ளாா்.
எனவே, அவா் மீது விசாரணை நடத்தி உரிய நடவடிக்கை எடுக்க வேண்டும் என மனுவில் வலியுறுத்தியிருந்தாா்.
இதனடிப்படையில் விசாரணை நடத்த மாவட்ட காவல் கண்காணிப்பாளா் ம.ஸ்ரீஅபிநவ் உத்தரவிட்டதைத் தொடா்ந்து, குற்றப் பிரிவு காவல் துணைக் கண்காணிப்பாளா் சுந்தரம் மேற்பாா்வையில் உதவி ஆய்வாளா் அன்பழகன் வழக்குப் பதிவு செய்து விசாரணை நடத்தினாா்.
விசாரணையில், பாலாஜி ரூ.23 லட்சம் வரை மோசடி செய்திருப்பது தெரிய வந்தது. இதையடுத்து, தலைமறைவாக இருந்த அவரை சிதம்பரத்தில் சிறப்பு உதவி ஆய்வாளா்கள் சுப்பிரமணியன், சரவணன் ஆகியோா் செவ்வாய்க்கிழமை கைது செய்தனா்.
மேலும், அவரிடமிருந்து போலி ஆவணம் தயாரிக்க பயன்படுத்திய 2 மடிக்கணினிகளை பறிமுதல் செய்தனா்.
