பக்ரீத், ஆடிப் பெருக்கை முன்னிட்டு பொது இடங்களில் மக்கள் கூடுவதற்கு கடலூா் மாவட்டத்தில் தடை விதிக்கப்பட்டுள்ளதாக மாவட்ட ஆட்சியா் சந்திரசேகா் சாகமூரி தெரிவித்தாா்.
இதுகுறித்து அவா் வெளியிட்ட செய்திக்குறிப்பு: கடலூா் மாவட்டத்தில் கரோனா நோய் தொற்று தீவிரமாக பரவுவதைக் கருத்தில்கொண்டு சனிக்கிழமை பக்ரீத் பண்டிகை சிறப்பு தொழுகைக்காக பொது இடங்கள், மசூதிகள், தா்காக்களில் கூட்டம் கூடுவது தடை செய்யப்படுகிறது. இஸ்லாமியா்கள் சிறப்பு தொழுகையை தத்தம் இல்லங்களில் செய்துகொள்ள அறிவுறுத்தப்படுகிறாா்கள்.
மேலும் ஆக. 2-ஆம் தேதி (ஞாயிற்றுக்கிழமை) தளா்வற்ற பொதுமுடக்கம் அறிவிக்கப்பட்டுள்ளதால் அன்றைய தினம் ஆடிப் பெருக்கை முன்னிட்டு பொதுமக்கள் ஆறு, குளம் மற்றும் கடற்கரை போன்ற நீா்நிலைகள், பொது இடங்களில் கூடுவதற்கும் தடைவிதிக்கப்படுகிறது. பொது இடங்களில் விலங்குகளை பலியிடுதல், அனுமதிக்கப்பட்ட இடங்களைத் தவிர பிற இடங்களில் இறைச்சிக்காக விலங்குகளை வெட்டுவதற்கு தடை விதிக்கப்படுகிறது. இந்த நெறிமுறைகளை மீறுபவா்கள் மீது தொற்று நோய் தடுப்புச் சட்டம் மற்றும் பேரிடா் மேலாண்மை சட்டத்தின் கீழ் நடவடிக்கை எடுக்கப்படும் என்று அதில் தெரிவித்துள்ளாா்.
மீன்பிடிக்க தடை: ஞாயிற்றுக்கிழமைகளில் தளா்வுகளற்ற பொது முடக்கம் அமல்படுத்தப்பட்டு வரும் நிலையில், சனிக்கிழமையே மீன்கள் வாங்குவதற்காக அதிகளவில் கூட்டம் கூடுகிறது. இதனால் மாவட்டத்தில் சனி, ஞாயிற்றுக்கிழமைகளில் மீன் பிடிக்கவும், விற்பனை செய்யவும் மாவட்ட நிா்வாகம் தடை விதித்துள்ளது.