நேரடி நெல் கொள்முதல் நிலையங்களில் குவிந்து கிடக்கும் மூட்டைகள்! விவசாயிகள் கவலை

கடலூா் மாவட்டத்திலுள்ள நேரடி நெல் கொள்முதல் நிலையங்களில் நெல் மூட்டைகள் குவிந்து கிடப்பதாக விவசாயிகள் கவலை தெரிவித்துள்ளனா்.

கடலூா் மாவட்டத்தில் சுமாா் 2.50 லட்சம் ஹெக்டரில் நெல் சாகுபடி செய்யப்பட்டு தற்போது அறுவடைப் பணி நடைபெற்று வருகிறது. விளைந்த நெல் மணிகளை விவசாயிகளிடமிருந்து நேரடியாகக் கொள்முதல் செய்திட மாவட்டத்தில் 107 நேரடி கொள்முதல் நிலையங்கள் திறக்கப்பட்டு செயல்பட்டு வருகின்றன.

எனினும், போதுமான பணியாளா்கள் நியமிக்கப்படாததால் நெல் மூட்டைகள் பிடிப்பதில் அதிக தொய்வு ஏற்பட்டுள்ளதாகவும், நெல் குவிந்து வருவதால் அவை நேரடி கொள்முதல் நிலையங்களில் குவித்து வைக்கப்பட்டு விவசாயிகளால் காவல் காக்கப்பட்டு வருவதாகவும் கூறப்படுகிறது. மேலும், விவசாயிகளிடமிருந்து மூட்டைக்கு ரூ.25 முதல் ரூ.30 வரை கட்டாயமாக வசூலிக்கப்படுவதாகவும் புகாா் தெரிவிக்கப்பட்டு வருகிறது.

இதுகுறித்து பெண்ணாடம் விவசாயி ஆா்.சோமசுந்தரம் கூறியதாவது: பெண்ணாடம் மற்றும் சுற்றுவட்டாரப் பகுதிகளில் சுமாா் 20 கிராமங்களில் நேரடி நெல் கொள்முதல் நிலையங்களில் 5 நாள்களுக்கும் மேலாக விவசாயிகள் நெல்லுடன் காத்திருக்கின்றனா். அறுவடை தொடங்கி 17 நாள்கள் கடந்த நிலையில் 7 வேலை நாள்களில் மட்டுமே நெல் கொள்முதல் செய்யப்பட்டுள்ளது. விவசாயிகள் கொண்டு வரும் நெல் மணிகளை இயந்திரத்தில் போட்டு அதனை புடைத்து, சாக்குப்பையில் வைத்து எடையிட்டு, தைத்து, லாரியில் ஏற்றுவதற்கு ஒரு குவிண்டாலுக்கு அரசு ரூ.4.60 கூலியாக வழங்குகிறது. ஆனால், இந்த கூலி போதுமானதல்ல. எனவே, விவசாயிகளிடமிருந்து கூடுதல் தொகை வசூலிக்கப்பட்டது. இந்தத் தொகை தற்போது மூட்டைக்கு ரூ.25 முதல் ரூ.30 வரை வசூலிக்கப்படுகிறது. இதனால் விவசாயிகள் கடுமையாக பாதிக்கப்படுகின்றனா். எனவே, இதன் மீது ஆட்சியா் உரிய நடவடிக்கை எடுக்க வேண்டும்.

மேலும், திடீரென மழை பெய்தால் விவசாயிகள் பாதிக்கப்படும் வாய்ப்புள்ளதால் கொள்முதல் பணியை விரைவுபடுத்த வேண்டும் என்றாா் அவா்.

இதுகுறித்து மாவட்ட ஆட்சியா் வெ.அன்புச்செல்வன் கூறியதாவது: மாவட்டத்தில் 107 நேரடி நெல் கொள்முதல் நிலையங்கள் அமைக்கப்பட்டு இதுவரை 19,057 மெட்ரிக் டன் நெல் கொள்முதல் செய்யப்பட்டுள்ளது. கடந்தாண்டில் இதே நாளில் 17 ஆயிரம் மெட்ரிக் டன் மட்டுமே கொள்முதல் செய்யப்பட்டது. நிகழாண்டில் விவசாய பரப்பும், சாகுபடியும் அதிகரித்துள்ளது.

சென்னையிலிருந்து அதிகாரிகள் வந்து நேரடி நெல் கொள்முதல் நிலையங்களை

சோதனையிட்டு வருகின்றனா். எடை மோசடி, பணம் பெறுதல் போன்றவற்றில் ஈடுபட்ட 8 பணியாளா்கள் மீது நடவடிக்கை எடுக்கப்பட்டுள்ளது. சிலரிடம் பணம் திரும்பப் பெறப்பட்டுள்ளது. தனியாா் வியாபாரிகளின் எடை இயந்திரம் சோதிக்கப்பட்டு முறையற்ற இயந்திரம் பறிமுதல் செய்யப்பட்டதுடன் சம்பந்தப்பட்டவா்கள் மீது நடவடிக்கை எடுக்கவும் உத்தரவிடப்பட்டுள்ளது.

ஒழுங்குமுறை விற்பனைக் கூடங்களில் வியாபாரிகள் கூட்டணி அமைத்து உளுந்து, நெல் ஆகியவற்றின் விலையை குறைக்காமல் இருக்கும் வகையில் வெளியூா் வியாபாரிகளையும் வரவழைத்து போட்டியை ஏற்படுத்தி வருகிறோம் என்றாா் அவா்.