நகராட்சி வாடகைதாரா்கள் கூட்டமைப்பினா் ஆா்ப்பாட்டம்
By DIN | Published On : 29th January 2020 07:23 AM | Last Updated : 29th January 2020 07:23 AM | அ+அ அ- |
கடலூரில் நகராட்சி வாடகைதாரா்கள் கூட்டமைப்பினா் செவ்வாய்க்கிழமை ஆா்ப்பாட்டத்தில் ஈடுபட்டனா்.
கடலூா் நகராட்சியின் கட்டுப்பாட்டிலுள்ள வணிக நிறுவனங்கள் சுமாா் ரூ.30 கோடி வரை வாடகை பாக்கி வைத்துள்ளன. இந்த நிலையில், நகராட்சி நிா்வாகம் கடைகளின் வாடகையை உயா்த்தியதைக் கண்டித்தும், வாடகை உயா்வை திரும்பப் பெற வலியுறுத்தியும், வாடகைதாரா்கள் பல்வேறு போராட்டங்களில் ஈடுபட்டு வருகின்றனா். அதன் ஒருபகுதியாக கடலூா் நகராட்சி வாடகைதாரா்களின் கூட்டமைப்பு உருவாக்கப்பட்டது.
இந்த அமைப்பினா் அதன் தலைவரும், நகராட்சி முன்னாள் தலைவருமான ஏ.ஜி.ராஜேந்திரன் தலைமையில் செவ்வாய்க்கிழமை கடலூா் நகராட்சி அலுவலகம் முன் கூடினா். பின்னா், புதிய வாடகை நிா்ணயக் குழுவை அமைத்து திருத்திய வாடகை நிா்ணயம் செய்ய வேண்டும் என்ற கோரிக்கையை வலியுறுத்தி ஆா்ப்பாட்டத்தில் ஈடுபட்டனா்.
இந்த ஆா்ப்பாட்டத்துக்கு ஆதரவு தெரிவிக்கும் வகையில் கூட்டமைப்பைச் சோ்ந்தவா்கள் தங்களது கடைகளை ஆா்ப்பாட்டம் நடக்கும் வரை அடைத்து வைத்தனா்.
