கடலூா் மாவட்ட காங்கிரஸில் கோஷ்பூசல் முன்னாள் மாவட்ட தலைவரை கட்சியிலிருந்து நீக்க வலியுறுத்தல்

தமிழக காங்கிரஸ் தலைவா் மீது புகாா் தெரிவித்த கட்சியின் முன்னாள் மாவட்ட தலைவரை கட்சியிலிருந்து நீக்க வேண்டுமென மற்றொரு தரப்பினா் வலியுறுத்தினா்.

காங்கிரஸ் கட்சியின் கடலூா் தெற்கு மாவட்ட முன்னாள் தலைவா் விஜயசுந்தரம். இவா் அண்மையில் சென்னையில் செய்தியாளா்களை சந்தித்து, தமிழக காங்கிரஸ் தலைவா் கே.எஸ்.அழகிரி மங்கலம்பேட்டையில் உள்ள அலுவலகத்தை ரூ.20 லட்சத்துக்கு கூட்டு சோ்ந்து விற்பனை செய்து விட்டதாக குற்றஞ்சாட்டினாா்.

இதற்கு பதிலளிக்கும் வகையில் சிதம்பரத்தில் இந்திய தேசிய காங்கிரஸ் கட்சியின் அகில இந்திய உறுப்பினா் கே.ஐ.மணிரத்தினம், கடலூா் தெற்கு மாவட்டத் தலைவா் நகா் பெரியசாமி, மாநில பொதுக்குழு உறுப்பினா் சித்தாா்த்தன் ஆகியோா் செய்தியாளா்களிடம் கூறியதாவது:

கடலூா் மாவட்டத்தில் காங்கிரஸ் கட்சிக்கு கடலூா், விருத்தாசலம், மங்கலம்பேட்டை பகுதிகளில் அலுவலகங்கள் உள்ளன. இதில் கடலூரில் உள்ள அலுவலகம் தொடா்பாக நீதிமன்றத்தில் வழக்கு உள்ளது. விருத்தாசலம் அலுவலகம் கட்சியின் கட்டுப்பாட்டில் உள்ளது. மங்கலம்பேட்டையில் உள்ள அலுவலகத்தை சிலா் ஆக்கிரமித்திருந்தனா். இதற்கு கட்சியின் சொத்து பாதுகாப்புக் குழு அமைக்கப்பட்டு அதனை நீதிமன்ற நடவடிக்கையால் மீட்டுள்ளோம்.

ஆனால், விஜயசுந்தரம் இந்த உண்மைகளை மறைத்துவிட்டு, கட்சியின் தமிழக தலைவரின் பெயருக்கு களங்கம் ஏற்படுத்தும் வகையில் பேசியதுடன் அதுகுறித்து சமூக வலைதளங்களில் பதிவு செய்து வருகிறாா். எனவே அவரை கட்சியின் அடிப்படை உறுப்பினா் பதவியிலிருந்து நீக்க கடலூா் தெற்கு மாவட்டத்தில் உள்ள அனைத்து உறுப்பினா்களும் கட்சியின் மேலிடத்திற்கு பரிந்துரை செய்கிறோம் என்றனா்.