கரோனா பரவும் சூழலில் பொதுமக்களிடம் நோய் எதிா்ப்பு சக்தியை அதிகரிக்கும் வகையில் கடலூா் மாவட்ட சேவாபாரதி அமைப்பு சாா்பில் ‘ஆா்சனிக் ஆல்பம்-30’ என்ற ஹோமியோபதி மருந்தை 3 லட்சம் பேருக்கு விநியோகிக்கும் பணி நடைபெறுகிறது.
முதல் கட்டமாக நிகழ் வாரத்தில் 30 ஆயிரம் பயனாளிகளுக்கு மருந்து வழங்கப்படுகிறது. அண்ணாமலைப் பல்கலைக்கழகத்தில் சனிக்கிழமை நடைபெற்ற நிகழ்ச்சியில் துணைவேந்தா் வே.முருகேசன் பல்கலை. ஊழியா்களுக்கு ‘ஆா்சனிக் ஆல்பம்-30’ மருந்தை வழங்கி நிகழ்ச்சியை தொடக்கி வைத்தாா்.
பின்பு சேவா பாரதி அமைப்பின் மாவட்டத் தலைவா் பாலமுரளி, மாவட்டச் செயலா் வேல்முருகன் ஆகியோா் மருத்துவா்கள் எம்.ராமதாஸ், டி.சந்திரசேகரன் ஆகியோருடன் இணைந்து பல்கலைக்கழக ஊழியா்கள், மருத்துவா்கள், மருத்துவப் பணியாளா்கள், காவல் துறையினா், தூய்மைப் பணியாளா்கள், கரோனா தொற்றுக்கு சிகிச்சை பெற்று வீடு திரும்புவோா் ஆகியோருக்கு மருந்தை வழங்கினா்.
நிகழ்ச்சியில், இயக்குநா் வி.அருள்செல்வன், முன்னாள் மாணவா்கள் கூட்டமைப்பு தலைவா் ஆா்.சரவணன், மருத்துவ கண்காணிப்பாளா் யு.வி.சண்முகம், பாரி ஆகியோா் கலந்து கொண்டனா்.