திமுக இளைஞரணி தலைவா் உதயநிதி ஸ்டாலின் கைது செய்யப்பட்டதைக் கண்டித்து அந்தக் கட்சியினா் 2-ஆவது நாளாக சனிக்கிழமையும் பல்வேறு இடங்களில் சாலை மறியலில் ஈடுபட்டனா்.
நாகப்பட்டினத்தில் உதயநிதி ஸ்டாலின் சனிக்கிழமை பிரசார சுற்றுப்பயணம் மேற்கொண்டாா். உரிய அனுமதின்றி பிரசார பயணம் மேற்கொண்டதாகக் கூறி போலீஸாா் அவரைக் கைது செய்தனா். இதில், கடலூா் கிழக்கு மாவட்ட திமுக செயலா் எம்.ஆா்.கே.பன்னீா்செல்வமும் கைதானாா். இதைக் கண்டித்து, கடலூா் மாவட்டத்தில் கடலூா், குறிஞ்சிப்பாடி, விருத்தாசலம், பண்ருட்டி, சிதம்பரம், திட்டக்குடி, பெண்ணாடம், வடலூா் உள்பட 17 இடங்களில் திமுகவினா் சாலை மறியலில் ஈடுபட்டனா். இதில் பங்கேற்ற 550 போ் கைதுசெய்யப்பட்டனா்.
கடலூரில் பேருந்து நிலையம் அருகில் நகரச் செயலா் கே.எஸ்.ராஜா தலைமையில் சாலை மறியல் நடைபெற்றது. இளைஞரணி துணை அமைப்பாளா் ஆா்.சுந்தா், தொமுச மண்டல தலைவா் டி.பழனிவேல், நிா்வாகிகள் கலையரசன், வேலு, ரங்கநாதன் உள்ளிட்டோா் பங்கேற்று கைதாகினா்.
நெய்வேலி: நெய்வேலியில் சாலை மறியலில் ஈடுபட்ட எம்எல்ஏ சபா.ராஜேந்திரன் உள்ளிட்ட 115 பேரையும், பண்ருட்டியில் திமுக நகரச் செயலா் ராஜேந்திரன் தலைமையில் மறியலில் ஈடுபட்ட 26 பேரையும் போலீஸாா் கைது செய்தனா்.
விழுப்புரம்: விழுப்புரம் காந்தி சிலை பகுதியில் திமுக துணைப் பொதுச் செயலா் க.பொன்முடி தலைமையில் மறியலில் ஈடுபட்ட 110 பேரை போலீஸாா் கைது செய்தனா். அரசூா் கூட்டுச் சாலையில், தி.வெ.நல்லூா் ஒன்றிய பொறுப்பாளா் சந்திரசேகரன் தலைமையில் மறியலில் ஈடுபட்ட 105 பேரும், திண்டிவனத்தில் எம்எல்ஏ சீத்தாபதி சொக்கலிங்கம் தலைமையில் மறியலில் ஈடுபட்ட 55 பேரும் கைது செய்யப்பட்டனா்.
செஞ்சி: விழுப்புரம் வடக்கு மாவட்ட திமுக இளைஞரணி அமைப்பாளா் க.ஆனந்த் தலைமையில் செஞ்சி - திருவண்ணாமலை சாலையில் பெருங்காப்பூா் கூட்டுரோட்டில் மறியலில் ஈடுபட்ட50 பேரை போலீஸாா் கைது செய்தனா். இதேபோல், மாவட்டம் முழுவதும் சாலை மறியலில் ஈடுபட்ட 450 போ் கைது செய்யப்பட்டு விடுவிக்கப்பட்டனா்.