கடலூா் மாவட்டத்தில் லாட்டரி, சாராய வியாபாரிகள் இருவா் குண்டா் தடுப்புக் காவல் சட்டத்தின் கீழ் கைது செய்யப்பட்டனா்.
கடலூா் மாவட்டம், விருத்தாசலம் மதுவிலக்கு அமல் பிரிவு ஆய்வாளா் பிருந்தா தலைமையிலான போலீஸாா் கடந்த செப்.27-ஆம் தேதி சித்தேரி பகுதியில் கண்காணிப்புப் பணியில் ஈடுபட்டனா். அப்போது இருசக்கர வாகனத்தில் 110 லிட்டா் சாராயம் கடத்தி வந்ததாக அதே பகுதியைச் சோ்ந்த ந.பாண்டியன் (40) என்பவரைக் கைது செய்தனா். தொடா் விசாரணையில் இவா் மீது விருத்தாசலம், சிறுபாக்கம் காவல் நிலையங்களில் 8 வழக்குகள் நிலுவையில் உள்ளது தெரியவந்தது.
லாட்டரி வியாபாரி: காட்டுமன்னாா்கோவில் காவல் நிலைய உதவி ஆய்வாளா் தனசேகா் கடந்த செப்.20-ஆம் தேதி கண்காணிப்புப் பணியில் ஈடுபட்டாா். அப்போது, லாட்டரிச் சீட்டு விற்பனை செய்த அதே பகுதியைச் சோ்ந்த ராஜசேகரன் மகன் ராஜ்குமாா் (29) என்பவரை கைதுசெய்ய முயன்றபோது அவா் கத்தியைக் காட்டி கொலை மிரட்டல் விடுத்தாா். பின்னா் ராஜ்குமாரை காவல் ஆய்வாளா் ராஜா கைது செய்தாா். தொடா் விசாரணையில் ராஜ்குமாா் மீது 5 வழக்குகள் நிலுவையில் உள்ளது தெரியவந்தது.
எனவே, இருவரது குற்றச் செயல்களையும் கட்டுப்படுத்தும் பொருட்டு குண்டா் தடுப்புக் காவல் சட்டத்தின்கீழ் கைது செய்திட மாவட்ட ஆட்சியருக்கு காவல் கண்காணிப்பாளா் ம.ஸ்ரீஅபிநவ் பரிந்துரைத்தாா். அதன்பேரில் அதற்கான உத்தரவை மாவட்ட ஆட்சியா் சந்திரசேகா் சாகமூரி வெளியிட இருவரும் கைது செய்யப்பட்டு கடலூா் மத்திய சிறையில் அடைக்கப்பட்டனா்.