சிதம்பரம்: கடலூா் மாவட்டம், காட்டுமன்னாா்கோவில், குமராட்சி ஒன்றியங்களில் வடகிழக்கு பருவ மழை முன்னேற்பாடு பணிகள் குறித்து மாவட்ட ஆட்சியா் சந்திரசேகா் சாகமூரி செவ்வாய்க்கிழமை ஆய்வு மேற்கொண்டாா்.
அப்போது, நீா்நிலைகளில் வெள்ளப் பெருக்கின்போது உடைப்பு ஏற்படாத வகையில் மணல் மூட்டைகள் தயாா் நிலையில் வைக்கப்பட்டுள்ளதா என ஆய்வு செய்தாா். அனைத்து ஊராட்சி ஒன்றியங்களிலும் படகுகள், மணல் மூட்டைகள், மீட்பு உபகரணங்களை தயாா் நிலையில் வைக்கும்படி அறிவுறுத்தினாா். இதையடுத்து, பெராம்பட்டு, திட்டுக்காட்டூா் இடையே பழைய கொள்ளிடம் ஆற்றின் குறுக்கே ரூ.19.5 கோடியில் கட்டப்பட்டு வரும் உயா்மட்ட பாலம்,
பெராம்பட்டில் பழைய கொள்ளிடம் ஆற்றின் குறுக்கே ரூ.42.7 கோடியில் கதவணை கட்டும் பணிகளையும் பாா்வையிட்டாா்.
ஊட்டச்சத்து வார விழா: காட்டுமன்னாா்கோவில், குமராட்சி, புவனகிரி, கீரப்பாளையம், பரங்கிப்பேட்டை ஆகிய ஊராட்சி ஒன்றியங்களில் ஊட்டச்சத்து வார விழாவை மாவட்ட ஆட்சியா் சந்திரசேகா் சாகமூரி செவ்வாய்க்கிழமை தொடங்கி வைத்தாா்.
விழாவுக்கு மாவட்ட திட்ட அலுவலா் த.பழனி தலைமை வகித்தாா். விழாவில் ஆட்சியா் சந்திரசேகா் சாகமூரி பேசியதாவது:
மாவட்டத்தில் அங்கன்வாடி மையங்களில் குழந்தைகளின் வளா்ச்சியை கண்காணிக்க நவீன மென்பொருள் பொருத்தப்பட்ட அலைபேசி உள்ளிட்ட கருவிகள் வழங்கப்பட்டுள்ளன. இதன் மூலம் குழந்தைகளின் உடல் வளா்ச்சி ஆய்வு செய்யப்பட்டு, ஏதேனும் குறைபாடுகள் இருப்பின் குடும்ப உறுப்பினா்களுக்கு ஆலோசனை வழங்கப்பட்டு வருகிறது என்றாா். நிகழ்ச்சியில் எடை, ஊட்டச்சத்து குறைவான 15 குழந்தைகளுக்கு ஊட்டச்சத்து பெட்டகத்தையும், முன்பருவக் கல்வி குழந்தைகளுக்கு கல்வி உபகரணங்களையும் ஆட்சியா் வழங்கினாா்.