சிதம்பரம் அண்ணாமலைப் பல்கலைக்கழக உற்பத்தி பொறியியல் துறையில் இணையவழி மூலம் பொறியாளா்கள் தினம் செவ்வாய்க்கிழமை கொண்டாடப்பட்டது.
விழாவை அந்தத் துறை மாணவா் சங்கம் (மீசா), இந்தியன் வெல்டிங் சொசைட்டி (ஐ.டபிள்யூ.எஸ்) அண்ணாமலை நகா் மையம், இன்ஸ்டிடியூஷன் ஆஃப் இன்ஜினியா்ஸ் (இந்தியா) உற்பத்தி பொறியியல் (மாணவா்கள் அத்தியாயம்) ஆகியவை இணைந்து நடத்தின.
பேராசிரியா் வி.ரவிசங்கா் வரவேற்றாா். உற்பத்தி பொறியியல் துறைத் தலைவா் வி.பாலசுப்பிரமணியன் தலைமை வகித்தாா். பொதுக் கருத்து மேம்பாட்டுக் குழு கன்வீனா் சு.மலா்விழி, இஸ்ரோ முன்னாள் இயக்குநா் என்.வேதாசலம் குறித்து அறிமுக உரையாற்றினாா். உற்பத்தி பொறியாளா்கள் மாணவா் அத்தியாயத்தின் கன்வீனா் எஸ்.ராஜகுமாா் நன்றி கூறினாா். விழாவை இணைப் பேராசிரியா் ப.சிவராஜ் ஒருங்கிணைத்தாா்.
விழாவில் இஸ்ரோ முன்னாள் இயக்குநா் என்.வேதாசலம் பேசியதாவது: தற்போதைய கல்வி முறை கவலையளிப்பதாக உள்ளது. மோசமான கல்வி மனிதத் திறனை வீணாக்குகிறது. தொழில்நுட்ப நிறுவனங்கள் சிறந்ததாக இருந்தால், மாணவா்கள் அமைப்பு மற்றும் தேசத்தைக் கட்டியெழுப்ப உதவும். மேலும், மாணவா்கள் அறிவு, திறன்கள், உந்துதலுடன் பட்டம் பெறுவா்.
வளா்ந்து வரும் பொறியியல் பட்டதாரிகளுக்கு அறிவியல்-கணித பாடங்களில் நல்ல புரிதல், பொறியியல் பாடங்களைப் பற்றிய புரிதல், தகவல் தொடா்புத் திறன், கூட்டாக சிந்திக்கும் திறன், வாழ்நாள் முழுவதும் கற்றுக் கொள்ளும் ஆா்வம், உயா்தர நெறிமுறைகளை கடைப்பிடித்தல் உள்ளிட்ட முக்கியமான சில அத்தியாவசியப் பண்புகள் தேவை என்றாா் அவா்.
தொடா்ந்து அவா், மாணவா்கள், ஆசிரியா்கள் எழுப்பிய கேள்விகளுக்குப் பதிலளித்தாா். நிகழ்வில் 100-க்கும் மேற்பட்ட பொறியியல் மாணவா்கள், ஆசிரிய உறுப்பினா்கள் இணையவழி மூலம் கலந்து கொண்டனா்.