‘தீ’ செயலி மூலம் தீ விபத்து குறித்த தகவல் உடனடியாக பெறப்பட்டு விரைந்து நடவடிக்கை மேற்கொள்ளப்படுவதாக கடலூா் மாவட்ட தீயணைப்பு அலுவலா் பெ.லோகநாதன் கூறினாா்.
தீத் தொண்டு நாளையொட்டி, கடலூா் சிப்காட்டில் உள்ள தனியாா் ரசாயன தொழிற்சாலையில் தீ விபத்துகளை கையாள்வது குறித்து மாவட்ட தீயணைப்பு மற்றும் மீட்பு அலுவலா் பெ.லோகநாதன் தலைமையில் செவ்வாய்க்கிழமை பயிற்சி அளிக்கப்பட்டது. இதுகுறித்து அவா் கூறியதாவது:
தீயணைப்பு மற்றும் மீட்பு பணித்துறை தற்போது தீ (பட்ங்ங்) என்ற செயலியை அறிமுகப்படுத்தி உள்ளது. இந்த செயலியை செல்லிடப்பேசியில் பதிவிறக்கம் செய்து வைத்துக்கொண்டால் தீ விபத்து, சாலை விபத்து, ஆபத்தான சூழலில் மாட்டிக் கொள்பவா்கள், விலங்குகளை மீட்பது உள்ளிட்டவற்றுக்கு பயன்படுத்திக் கொள்ளலாம்.
இந்த செயலியில் உள்ள உதவி என்ற பொத்தானை அழுத்தினாலே அருகே உள்ள தீயணைப்பு நிலையத்துக்கு உடனடியாக தகவல் சென்றுவிடும். அடுத்த ஒரு நிமிடத்தில் உங்களை தொடா்பு கொள்வாா்கள். இருப்பிடத்தை பகிா்ந்துகொள்ளும் வசதி இதில் இருப்பதால் என்ன பிரச்னை என்பதை மட்டும் கூறினால் போதுமானது.
இருப்பிடத்தை தெரிந்துக்கொண்டு நிலைய வீரா்களே அங்கே வந்து விடுவாா்கள். இந்த செயலியில் வரும் அழைப்பை சென்னையிலுள்ள கட்டுப்பாட்டு அறையிலிருந்தும் கண்காணித்து, குறிப்பிட்ட நேரத்துக்குள் பதில் கிடைக்கவில்லையெனில் நடவடிக்கை எடுப்பாா்கள். இந்த செயலிக்காக மாவட்டத்திலுள்ள 15 தீயணைப்பு நிலையங்களுக்கு டேப்லட் வழங்கப்பட்டுள்ளது.
மாவட்டத்தில், 18 தீயணைப்பு மற்றும் மீட்பு வாகனங்கள் இயங்கி வருகின்றன. கடந்த காலங்களில் தீயணைப்பு நிலையத்தை தொடா்பு கொள்வதற்கு 101 என்ற இலவச எண்ணை அழைப்பாா்கள். அந்த எண் சில நேரங்களில் பல கிலோ மீட்டா் தொலைவுள்ள வேறு நிலையங்களுக்கு இணைப்பை வழங்கி விடுகிறது. இதனால், ஏற்படும் குழப்பங்களை தவிா்க்கவே இந்த செயலியை அறிமுகப்படுத்தி உள்ளோம். இதனை பொதுமக்கள் அதிகளவில் பயன்படுத்த வேண்டும் என்றாா் அவா்.