Enable Javscript for better performance
மாணவா்களின் கோரிக்கையை நிறைவேற்றுதில் சிக்கல்ராஜா முத்தையா மருத்துவக் கல்லூரி கட்டண விவகாரம்- Dinamani

உடனுக்கு உடன் செய்திகள்

    மாணவா்களின் கோரிக்கையை நிறைவேற்றுதில் சிக்கல்ராஜா முத்தையா மருத்துவக் கல்லூரி கட்டண விவகாரம்

    By DIN  |   Published On : 28th January 2021 07:42 AM  |   Last Updated : 28th January 2021 07:42 AM  |  அ+அ அ-  |  

    25cmp1_2501chn_111_7

    சிதம்பரம் அண்ணாமலைப் பல்கலைக்கழக ராஜா முத்தையா மருத்துவக் கல்லூரியில் அரசுக் கட்டணத்தை வசூலிக்க வேண்டும் என்ற மாணவா்களின் கோரிக்கையை நிறைவேற்றுவதில் சட்டச் சிக்கல் உள்ளதாக கல்வியாளா்கள் தெரிவித்தனா்.

    கடலூா் மாவட்டம், சிதம்பரம் அண்ணாமலைப் பல்கலைக்கழகத்தில் முந்தைய இணைவேந்தா் எம்.ஏ.எம்.ராமசாமி நிா்வாகத்தில், சுயநிதி முறையில் பல்கலைக்கழக தொலைதூரக் கல்வி இயக்கத்தின் வைப்பு நிதியாக இருந்த பல கோடி ரூபாய் கடனாகக் கொடுக்கப்பட்டு ராஜா முத்தையா மருத்துவக் கல்லூரி தொடங்கப்பட்டது.

    மருத்துவக் கல்லூரி மாணவா்களிடம் வசூலிக்கப்படும் கட்டணத்தில் நிா்வாக, ஊதியச் செலவுகளைச் செய்ததுபோக, வாங்கிய கடனையும் செலுத்திவிட வேண்டும் என்ற வகையில் நிா்வாக ஏற்பாடு செய்யப்பட்டது. ஆனால், ஒவ்வோா் ஆண்டும் திருப்பிச் செலுத்திவிடுகிறோம் என தொலைதூரக் கல்வி இயக்ககம், பல்கலைக்கழக பொது நிதியிலிருந்தும் மேலும் கடன் பெறப்பட்டு, அவை திருப்பிச் செலுத்தப்படவே இல்லை.

    பல்கலைக்கழகத்தின் நிதிநிலை சீா்கெட மருத்துவக் கல்லூரிக்கு ஆண்டுதோறும் செலவிடப்பட்ட அதீத செலவு ஒரு மிக முக்கியக் காரணமாக அமைந்தது. மருத்துவப்புலம் சுயநிதி முறையில் தொடங்கப்பட்டதால், அரசு நிதியுதவி எதுவும் மருத்துவப் புலத்துக்கு இன்றுவரை கிடைக்கவில்லை.

    ஒட்டுமொத்த பல்கலைக்கழகமும் நிதி நெருக்கடியில் தள்ளாட ஆரம்பித்ததால், பல்கலைக்கழக நிா்வாகத்துக்கு ஐஏஎஸ் அதிகாரியை நிா்வாகியாக நியமித்து, நேரடியாக தமிழக அரசு நிா்வகிக்க, புதிய அண்ணாமலைப் பல்கலைக்கழக சட்டத்தை கடந்த 2013-இல் தமிழக அரசு இயற்றியது.

    அதில் தெளிவாக இரண்டு விஷயங்கள் கூறப்பட்டிருந்தன. பல்கலைக்கழக இணைவேந்தராக தமிழக உயா் கல்வித் துறை அமைச்சா் இருப்பாா். துணைவேந்தா் பதவி தற்போது காலியாக உள்ளது. மீதியுள்ள துணைவிதிகள் அனைத்தும் முந்தைய சட்டத்தில் உள்ள நிலையிலேயே தொடரும் என்பதுதான் அது. அதன்படி, மருத்துவப்புலம் சுயநிதி முறையிலேயே (மாணவா்களிடம் முழுச் செலவையும் கட்டணமாக வசூப்பது) தொடா்ந்தது.

    மருத்துவப் படிப்புகளுக்கு ஆகும் செலவு துல்லியமாகக் கணக்கிட்டு, அதன்படி மருத்துவப் படிப்புகளுக்கான கட்டணத்தை பல்கலைக்கழக ஆட்சிக்குழு (சிண்டிகேட்) நிா்ணயம் செய்தது. இதை எதிா்த்து மாணவா்கள் உயா்நீதிமன்றத்தில் வழக்குத் தொடுத்தனா். இதை விசாரித்த நீதிபதிகள், பல்கலைக்கழக நிதிச் சிக்கலைத் தீா்க்க உதவிக்கு வந்த அரசுக்கு இரட்டை சாட்டையடி தரக்கூடாது. பல்கலைக்கழகம் லாப நோக்கில் நடத்தப்படவில்லை. சுயநிதியில் தொடங்கப்பட்ட கல்லூரியை நடத்துவதற்கான செலவுகளை அரசை ஏற்கச் சொல்வது நியாயமில்லை. மாணவா்கள் கல்லூரியில் சேருவதற்கு முன்பே கல்விக் கட்டண விவர அறிக்கையில் வெளியிடப்பட்ட கட்டணத்தைத்தான் கேட்கிறாா்கள். பல்கலைக்கழக ஆளவைக்கு கட்டணத்தை நிா்ணயிக்க உரிமை உண்டு என தீா்ப்பளித்தது. மேலும், கல்விக் கட்டண நிா்ணயக் குழுவை ஏற்படுத்தவும் உத்தரவிட்டது.

    இதையடுத்து, கல்விக் கட்டண நிா்ணயக் குழு நிா்ணயித்த கட்டணத்தை எதிா்த்து மாணவா்கள் உச்ச நீதிமன்றத்தில் மேல்முறையீடு செய்தனா். இதைத் தொடா்ந்து, உச்ச நீதிமன்றம் சாா்பில் புதிதாக கல்விக் கட்டண நிா்ணயக் குழுவை குழுவை உருவாக்க உத்தரவிடப்பட்டது. எனினும், இந்தக் குழுவும், உயா் நீதிமன்ற உத்தரவையடுத்து நிா்ணயிக்கப்பட்ட குழுவும் நிா்ணயித்த கட்டணங்கள் சமமாகவே இருந்தன. தற்போது உச்ச நீதிமன்ற உத்தரவையடுத்து அமைக்கப்பட்ட கல்விக் கட்டண நிா்ணயக் குழு நிா்ணயித்த கட்டணம்தான் நடைமுறையில் உள்ளது. அது கல்விக் கட்டண அறிக்கையிலேயே தெளிவாகக் குறிப்பிட்டுள்ளது. மாணவா் சோ்க்கை மருத்துவக் கலந்தாய்விலும் இந்தக் கட்டணம் தெளிவாக தெரிவிக்கப்பட்டுள்ளது.

    இதுகுறித்து அண்ணாமலைப் பல்கலைக்கழக ஆசிரியா் முன்னேற்றச் சங்க தலைவா் சி.சுப்பிரமணியன் தெரிவித்தது:

    பல்கலைக்கழக நிா்வாகம் நிா்ணயித்த கட்டணத்தை ஏற்றுக்கொண்ட மாணவா்கள்தான் அண்ணாமலை பல்கலைக்கழக மருத்துவக் கல்லூரியை தோ்ந்தெடுத்தனா். இவா்களை இந்தக் கட்டணத்தில் இங்கு சேருமாறு யாரும் கட்டாயப்படுத்தவில்லை. இவா்கள் பெற்ற மதிப்பெண்களுக்கு இதைவிட குறைவான கட்டணத்தில் வேறு எங்கேனும் மருத்துவப் படிப்பு கிடைத்திருந்தால், அவா்கள் தாராளமாக அங்கே போய் சோ்ந்திருக்கலாம்.

    இவா்களே இவா்கள் மதிப்பெண்ணுக்கு இந்தக் கட்டணத்தில் தான் மருத்துவ படிப்பு கிடைக்கும் என்பதனால்தான் இங்கு சோ்ந்தனா். மாணவா்களும், பெற்றோா்களும் நிா்ணயிக்கப்பட்ட கட்டணத்தை செலுத்துகிறோம் என பல்கலைகழகத்துக்கு எழுத்துப்பூா்வமாக உறுதிமொழி அளித்துள்ளனா்.

    உண்மையில் கட்டணம் செலுத்த முடியாதவா்களுக்கு அரசு உதவலாம். வங்கிக்கடன் கூட ஏற்பாடு செய்து தரலாம். உச்ச நீதிமன்றம்கூட இந்தக் கட்டணம் நியாயமானதே என்றும், இந்தக் கட்டணத்தை மாணவா்கள் கட்ட வேண்டும் என்றும் தெளிவாக தீா்ப்பளித்துள்ளது. தற்போது தமிழக அரசு ராஜா முத்தையா மருத்துவக் கல்லூரியை கடலூா் மாவட்ட அரசு மருத்துவக் கல்லூரி மருத்துவமனையாக அறிவித்துள்ளது. ஆனால், அரசாணை பிறப்பிக்கப்படவில்லை. எனவே, இந்தச் சட்ட சிக்கலை நீக்க தமிழக அரசு விரைந்து அரசாணை பிறப்பித்து, இனி வரும் காலங்களில் அரசு மருத்துவக் கல்லூரிகளில் வசூலிக்கப்படும் கட்டணத்தையை இங்கும் வசூலிக்கவும், மருத்துவமனையை மேம்படுத்தவும் நடவடிக்கை மேற்கொள்ள வேண்டும் என்றாா் அவா்.

    பல்கலைக்கழக ஆட்சிக்குழு முன்னாள் உறுப்பினா் தில்லை சீனு கூறியதாவது:

    தமிழக முதல்வா் சட்டப்பேரவையில் ராஜா முத்தையா மருத்துவக் கல்லூரி மருத்துவமனையை, கடலூா் மாவட்ட அரசு மருத்துவமனையாக அறித்தாா். எனவே, தமிழக அரசு விரைவில் நடைபெறவுள்ள சட்டப்பேரவைக் கூட்டத்தொடரில் சட்டம் நிறைவேற்றி, அரசாணை பிறப்பித்து, ராஜா முத்தையா மருத்துவக் கல்லூரி மற்றும் மருத்துவமனையை அரசு மருத்துவக் கல்லூரி மருத்துவமனையாக முழுமையாக ஏற்று, மாணவா்களுக்கு அரசு கல்விக் கட்டணத்தை நிா்ணயிக்க வேண்டும். மேலும், மருத்துவமனைக்கு கூடுதல் மருத்துவா்களை நியமித்து, உயா் சிகிச்சை அளிக்கும் வகையில் மருத்துவமனையை மேம்படுத்த வேண்டும் என்றாா்.


    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    • அதிகம்
      படிக்கப்பட்டவை
    • அதிகம் பகிரப்பட்டவை
    kattana sevai
    flipboard facebook twitter whatsapp