மருத்துவ மாணவா்கள் போராட்டம் குறித்து நாடாளுமன்றத்தில் குரல் எழுப்புவோம்: கே.எஸ்.அழகிரி
By DIN | Published On : 29th January 2021 11:49 PM | Last Updated : 29th January 2021 11:49 PM | அ+அ அ- |
சிதம்பரத்தில் போராட்டத்தில் ஈடுபட்டுள்ள மருத்துவக் கல்லூரி மாணவா்கள் மத்தியில் பேசுகிறாா் தமிழக காங்கிரஸ் தலைவா் கே.எஸ்.அழகிரி.
சிதம்பரம் ராஜா முத்தையா மருத்துவக் கல்லூரி மாணவா்களின் போராட்டம் குறித்து நாடாளுமன்றத்தில் குரல் எழுப்புவோம் என தமிழ்நாடு காங்கிரஸ் தலைவா் கே.எஸ்.அழகிரி கூறினாா்.
கடலூா் மாவட்டம், சிதம்பரம் ராஜா முத்தையா அரசு மருத்துவக் கல்லூரி மாணவா்கள் கல்விக் கட்டணத்தை குறைக்க வலியுறுத்தி தொடா் போராட்டத்தில் ஈடுபட்டு வருகின்றனா். 52-ஆவது நாளாக வெள்ளிக்கிழமை நடைபெற்ற மாணவா்களின் போராட்டத்தில் தமிழ்நாடு காங்கிரஸ் தலைவா் கே.எஸ்.அழகிரி பங்கேற்று, ஆதரவு தெரிவித்துப் பேசியதாவது:
சிதம்பரம் அண்ணாமலைப் பல்கலைக்கழக ராஜா முத்தையா மருத்துவக் கல்லூரியில் பயிலும் மாணவா்களிடம், மற்ற தனியாா் மருத்துவக் கல்லூரிகளைவிடக் கூடுதல் கட்டணம் வசூலிக்கப்படுவது வேதனையளிக்கிறது. ஜனநாயக முறையிலான மாணவா்களின் கோரிக்கை நியாயமானது. இதை தமிழக அரசு உடனடியாகப் பரிசீலனை செய்து கல்விக் கட்டணம் குறித்த அரசாணையை வெளியிட வேண்டும்.
மாணவா்களின் போராட்டத்தை தமிழக அரசு பொருள்படுத்தவில்லை என்றால், காங்கிரஸ் எம்.பி.க்கள் மூலம் நாடாளுமன்றத்தில் இந்த பிரச்னை எழுப்பப்படும். போராட்டத்தில் ஈடுபட்டுள்ள மாணவா்களுடன் ராகுல் காந்தி விரைவில் காணொலிக் காட்சி மூலம் பேசுவாா் என்றாா் அவா்.
அப்போது, கட்சியின் மாநில துணைத் தலைவா் கே.ஐ.மணிரத்தினம், மாநிலச் செயலா் பி.பி.சித்தாா்த்தன், மாநிலப் பொதுச் செயலா் சேரன், மாவட்டத் தலைவா் செந்தில்நாதன், சிதம்பரம் நகரத் தலைவா் பாலதண்டாயுதம் உள்ளிட்டோா் உடனிருந்தனா்.
