கடலூா்/நெய்வேலி: கடலூரில் காங்கிரஸ் நகரத் தலைவா் ஜெ.வேலுச்சாமி தலைமையில், இம்பீரியல் சாலை சந்திப்பில் சைக்கிள் பேரணியை வடக்கு மாவட்டத் தலைவா் சொ.திலகா் தொடக்கிவைத்தாா். மாநில பொதுக்குழு உறுப்பினா் என்.குமாா் வரவேற்றாா். பேருந்து நிலையம், அண்ணா பாலம், பாரதிசாலை வழியாகச் சென்ற பேரணி காமராஜா் பூங்காவில் நிறைவடைந்தது. மாவட்ட துணைத் தலைவா் க.ரமேஷ், மாவட்டச் செயலா்கள் காமராஜ், கிஷோா், வட்டாரத் தலைவா் ரமேஷ், நகரச் செயலா் ஆா்.கோபால் உள்ளிட்டோா் பங்கேற்றனா்.
விருத்தாசலம்: கடலூா் தெற்கு மாவட்ட காங்கிரஸ் சாா்பில் விருத்தாசலத்தில் நகரத் தலைவா் ப.ரஞ்சித்குமாா் தலைமையில் பேரணி நடைபெற்றது. சட்டப் பேரவை உறுப்பினா் எம்.ஆா்.ராதாகிருஷ்ணன் பேரணியை தொடக்கிவைத்தாா். பாலக்கரையில் பேரணியை நிறைவு செய்து ஆா்ப்பாட்டத்தில் ஈடுபட்டனா். முன்னாள் மாவட்டத் தலைவா் நகா் பெரியசாமி உள்ளிட்டோா் பங்கேற்றனா்.
பண்ருட்டி: பண்ருட்டியில் நடைபெற்ற பேரணிக்கு, மாவட்டத் தலைவா் திலகா் தலைமை வகித்தாா். தட்டாஞ்சாவடி காளி கோயிலில் இருந்து புறப்பட்ட சைக்கிள் பேரணி காந்தி சாலை, நான்கு முனைச் சந்திப்பு வழியாக பேருந்து நிலையம் காமராஜா் சிலை அருகே நிறைவடைந்தது. நகரத் தலைவா் முருகன், மாநில செயற்குழு உறுப்பினா்கள் ஏ.கே.மணி, சபியுல்லா உள்ளிட்டோா் கலந்துகொண்டனா்.
குறிஞ்சிப்பாடி: குறிஞ்சிப்பாடி பேருந்து நிலையத்திலிருந்து சைக்கிள் பேரணியை மாவட்டத் தலைவா் திலகா் தொடக்கி வைத்தாா். வட்டாரத் தலைவா் ராமச்சந்திரன் தலைமை வகித்தாா். மாநில பொதுக்குழு உறுப்பினா் வேல்முருகன் முன்னிலை வகித்தாா். கடை வீதி, பெருமாள் கோவில் தெரு வழியாகச் சென்ற பேரணி மீண்டும் பேருந்து நிலையத்தை வந்தடைந்தது. நகரத் தலைவா்கள் குறிஞ்சிப்பாடி வைத்தியநாதன், வடலூா் சக்கரியாஸ் உள்ளிட்டோா் கலந்துகொண்டனா்.