கடலூா் மாவட்டத்தில் சனிக்கிழமை நடைபெற்ற தேசிய மக்கள் நீதிமன்றத்தில் 2,704 வழக்குகளுக்கு தீா்வு காணப்பட்டன.
தேசிய மற்றும் தமிழ்நாடு மாநில சட்டப் பணிகள் ஆணைக் குழு அறிவுறுத்துதலின்படி கடலூா் மாவட்ட சட்டப் பணிகள் ஆணைக் குழு சாா்பில் மாவட்டம் முழுவதும் மக்கள் நீதிமன்றம் சனிக்கிழமை நடைபெற்றது. கடலூா் மாவட்ட தலைமை நீதிமன்றத்தில் நடைபெற்ற மக்கள் நீதிமன்றத்தை முதன்மை மாவட்ட நீதிபதி எஸ்.ஜவஹா் தலைமை வகித்து தொடக்கி வைத்தாா்.
கூடுதல் மாவட்ட அமா்வு நீதிபதி செந்தில்குமாா், குடும்ப நல நீதிமன்ற நீதிபதி புவனேஸ்வரி, தொழிலாளா் நல நீதிமன்றத் தலைவா் சுபாஅன்புமணி, போக்சோ நீதிமன்ற நீதிபதி எழிலரசி, மகளிா் நீதிமன்ற நீதிபதி பாலகிருஷ்ணன், எஸ்சி, எஸ்டி நீதிமன்ற நீதிபதி உத்தமராஜ், தலைமை குற்றவியல் நீதித் துறை நடுவா் பிரபாகா் உள்ளிட்டோா் முன்னிலை வகித்தனா். மாவட்ட சட்டப் பணிகள் ஆணைக்குழு செயலா் பாக்கியம் வரவேற்றாா். இதில் நீதிபதிகள், மாவட்ட பாா் அசோசியேஷன், லாயா்ஸ் அசோசியேஷன் நிா்வாகிகள், மூத்த வழக்குரைஞா்கள் பங்கேற்று வழக்கு விசாரணைகளை நடத்தினா்.
இதேபோல, பண்ருட்டி, நெய்வேலி, சிதம்பரம், விருத்தாசலம், திட்டக்குடி, பரங்கிப்பேட்டை, காட்டுமன்னாா்கோவில் ஆகிய நீதிமன்றங்களிலும் அந்தந்த நீதிமன்ற நீதிபதிகள் முன்னிலையில் வழக்குகள் விசாரணைக்கு எடுத்துக்கொள்ளப்பட்டன. மாவட்டம் முழுவதும் மொத்தம் 4,688 வழக்குகள் விசாரணைக்கு எடுத்துக் கொள்ளப்பட்டதில், 2,704 வழக்குகளுக்கு தீா்வு காணப்பட்டன. இதில், பணம் மற்றும் சொத்து வழக்குகளில் ரூ.14.70 கோடிக்கு தீா்வு காணப்பட்டு, சம்பந்தப்பட்ட பயனாளிகளுக்கு வழங்க உத்தரவிடப்பட்டது.