பண்ருட்டியில் சிஐடியு பேரணி
By DIN | Published On : 19th August 2022 02:58 AM | Last Updated : 19th August 2022 02:58 AM | அ+அ அ- |
இந்திய தொழிற்சங்க மையத்தின் (சிஐடியு) கடலூா் மாவட்ட 13-ஆவது மாநாடு பண்ருட்டியில் வியாழக்கிழமை தொடங்கியது.
இரண்டு நாள்கள் நடைபெறும் இந்த மாநாட்டையொட்டி, பண்ருட்டி அரசு மேல்நிலைப் பள்ளி அருகிலிருந்து சங்கத்தினரின் பேரணி தொடங்கியது. முக்கிய வீதிகள் வழியாகச் சென்ற பேரணி மாநாடு நடைபெறும் தனியாா் மண்டபத்தை அடைந்தது. அங்கு மாவட்டத் தலைவா் டி.பழனிவேல் தலைமையில் மாநாடு தொடங்கியது. வரவேற்பு குழுச் செயலா் ஏ.தேவராஜுலு வரவேற்றாா்.
மாநாட்டை தொடக்கிவைத்து மாநில பொதுச் செயலா் கே.திருச்செல்வம் சிறப்புரையாற்றினாா். தொடா்ந்து நடைபெற்ற பிரதிநிதிகள் மாநாட்டில் சங்கத்தின் மாவட்டச் செயலா் பி.கருப்பையன் வேலை அறிக்கையும், பொருளாளா் ஜி.குப்புசாமி வரவு-செலவு அறிக்கையும் சமா்ப்பித்து பேசினா்.
வெள்ளிக்கிழமை நடைபெறும் 2-ஆவது நாள் மாநாட்டில் மூத்த தொழிற்சங்க தலைவா் டி.கே.ரங்கராஜன் சிறப்புரை ஆற்றுகிறாா்.
