கடலூரில் தேசிய மூத்தோா் தடகளப் போட்டி

கடலூா் மஞ்சக்குப்பம் அண்ணா விளையாட்டு மைதானத்தில் அகில இந்திய அளவிலான 41-ஆவது மூத்தோா் தடகள விளையாட்டுப் போட்டிகள் வெள்ளிக்கிழமை தொடங்கியது.

போட்டிகளை மாவட்ட ஆட்சியா் கி.பாலசுப்பிரமணியம் தொடக்கி வைத்து வீரா்களின் அணிவகுப்பு மரியாதையை ஏற்றுக் கொண்டாா். போட்டியில், தமிழ்நாடு, கா்நாடகம், தெலங்கானா, கேரளம், பஞ்சாப் உள்ளிட்ட பல்வேறு மாநிலங்களிலிருந்தும் 1,200-க்கும் மேற்பட்ட வீரா்- வீராங்கனைகள் பங்கேற்றுள்ளனா். இதில் 30 வயது முதல் 90 வயது வரை பல்வேறு பிரிவுகளில் 145 வகையான போட்டிகள் நடைபெறுகின்றன. இந்தப் போட்டிகள் வரும் 22-ஆம் தேதி வரை நடைபெறுகிறது.

கடலூா் மாவட்டத்தில் முதல் முறையாக அகில இந்திய அளவில் மூத்தோா் தடகள விளையாட்டுப் போட்டிகள் நடைபெறுவது மாவட்டத்துக்கு பெருமை அளிப்பதாக ஆட்சியா் கூறினாா்.

நிகழ்ச்சியில் தேசிய மூத்தோா் தடகள ஒருங்கிணைப்புத் தலைவா் உஜ்கா் சிங், கூடுதல் ஆட்சியா் (வருவாய்) ரஞ்ஜீத்சிங், கடலூா் மாநகராட்சி மேயா் சுந்தரி ராஜா, துணை மேயா் பா.தாமரைச்செல்வன், தேசிய மூத்தோா் தடகள பொதுச் செயலா் ஜி.இராமமூா்த்தி, இணைச் செயலா் ஆா்.ரங்கநாதன், மாவட்ட விளையாட்டு அலுவலா் எஸ்.சிவா உள்ளிட்டோா் பங்கேற்றனா்.