கல்லூரி பேருந்து - லாரி மோதல்:மாணவா்கள் 20 போ் காயம்

விருத்தாசலம் அருகே கல்லூரி பேருந்து மீது லாரி மோதியதில் மாணவ, மாணவிகள் 20 போ் வெள்ளிக்கிழமை காயமடைந்தனா்.

கடலூா் மாவட்டம், தொழுதூரில் உள்ள தனியாா் கல்லூரி பேருந்து வடலூா், நெய்வேலி, விருத்தாசலம், சாத்தியம் உள்ளிட்ட பகுதிகளைச் சோ்ந்த சுமாா் 50 மாணவா்கள், ஆசிரியா்களுடன் வெள்ளிக்கிழமை தொழுதூா் நோக்கிச் சென்றுகொண்டிருந்தது. பேருந்தை ஞானசேகரன் இயக்கினாா். விருத்தாசலம் அருகே சாத்தியத்தில் மாணவா்களை ஏற்றுவதற்காக கல்லூரி பேருந்து நின்றுகொண்டிருந்தபோது, பின்னால் வந்த லாரியானது பேருந்தின் பின்புறம் மோதியது. இதில் பேருந்திலிருந்த மாணவ, மாணவிகளில் 20-க்கும் மேற்பட்டோா் காயமடைந்தனா். அவா்கள் உடனடியாக விருத்தாசலம் அரசு மருத்துவமனைக்கு கொண்டு செல்லப்பட்டனா். பாலாஜி என்ற மாணவருக்கு கையில் பலத்த காயம் ஏற்பட்டது.

விபத்து குறித்து தகவலறிந்த மாநில தொழிலாளா் நலத் துறை அமைச்சா் சி.வெ.கணேசன், விருத்தாசலம் நகா்மன்றத் தலைவா் சங்கவி ஆகியோா் மருத்துவமனையில் சிகிச்சைப் பெற்றுவரும் மாணவா்களை சந்தித்து ஆறுதல் கூறினாா். விபத்து குறித்து விருத்தாசலம் போலீஸாா் விசாரணை நடத்தி வருகின்றனா்.