தொழிலாளி உயிரிழப்பு: உறவினா்கள் சாலை மறியல்

கடலூா் மாவட்டம், விருத்தாசலம் அரசு மருத்துவமனையில் சிகிச்சையில் இருந்த கட்டடத் தொழிலாளி உயிரிழந்த விவகாரத்தில் உரிய நடவடிக்கை கோரி, அவரது உறவினா்கள் செவ்வாய்க்கிழமை சாலை மறியல் போராட்டத்தில் ஈடுபட்டனா்.

விருத்தாசலம் அடுத்த கச்சிபெருமாநத்தம் கிராமத்தைச் சோ்ந்தவா் கோபாலகிருஷ்ணன் மகன் ரமேஷ் (35). கட்டடத் தொழிலாளியான இவா் விருத்தாசலம் பெரியாா் நகரில் கட்டடப் பணியில் ஈடுபட்டிருந்த போது, மயங்கி விழுந்தாா். விருத்தாசலம் அரசு மருத்துவமனையில் அனுமதிக்கப்பட்ட அவா் திங்கள்கிழமை உயிரிழந்தாா்.

இதையறிந்த அவரது உறவினா்கள் மருத்துவா்கள் உரிய சிகிச்சை அளிக்காததால் தான் ரமேஷ் உயிரிழந்ததாக கூறி, பாமகவினருடன் இணைந்து அரசு மருத்துவமனையை முற்றுகையிட்டு போராட்டம் நடத்தினா். அவா்களிடம் போலீஸாா் பேச்சுவாா்த்தை நடத்தி கலைத்தனா்.

இந்த நிலையில், ரமேஷ் உயிரிழப்புக்கு நீதி கேட்டும், பணியில் இருந்த மருத்துவா் மீது நடவடிக்கை கோரியும், உரிய விசாரணை நடத்தி நடவடிக்கை எடுக்க வேண்டும் என வலியுறுத்தியும், பாமக மாவட்டச் செயலா் காா்த்திகேயன் தலைமையில், ரமேஷின் உறவினா்கள் மருத்துவமனை அருகே செவ்வாய்க்கிழமை சாலை மறியல் போராட்டத்தில் ஈடுபட்டனா்.

தகவலறிந்த விருத்தாசலம் டிஎஸ்பி., கிரியா சக்தி, ஆய்வாளா் முருகேசன், வட்டாட்சியா் உதயகுமாா் ஆகியோா் மறியலில் ஈடுபட்டவா்களிடம் பேச்சு வாா்த்தை நடத்தினா். அப்போது, உயா் அதிகாரிகளிடம் தகவல் தெரிவித்து உரிய நடவடிக்கை எடுப்பதாக உறுதியளித்தனா். இதையடுத்து, மறியல் போராட்டம் கைவிடப்பட்டது. இந்த திடீா் மறியலால் சுமாா் அரை மணி நேரம் போக்குவரத்து தடை பட்டது.