ரூ.15 கோடியில் விகேடி சாலை சீரமைப்புப் பணி: நெய்வேலி எம்எல்ஏ தகவல்

விக்கிரவாண்டி முதல் பின்னலூா் வரையிலான (விக்கிரவாண்டி - கும்பகோணம் - தஞ்சாவூா்) விகேடி தேசிய நெடுஞ்சாலை சீரமைப்புப் பணி ரூ.15 கோடி மதிப்பில் ஓரிரு நாள்களில் தொடங்க உள்ளதாக நெய்வேலி எம்எல்ஏ சபா.ராஜேந்திரன் தெரிவித்தாா்.

விக்கிரவாண்டி முதல் தஞ்சாவூா் வரை 165 கி.மீ. நீளமுள்ள இந்தச் சாலை அமைக்க ரூ.3,517 கோடி நிதி ஒதுக்கீட்டுக்கு ஒப்புதல் அளித்து 2018 ஏப்ரல் முதல் பணி தொடங்கப்பட்டது. 2020-க்குள் பணி முடிக்கப்பட்டு, 2021-ஆம் ஆண்டு மக்கள் பயன்பாட்டுக்கு வரும் என்று மத்திய அரசு அறிவித்திருந்தது. ஆனால், சாலைப் பணிகள் பல கட்டங்களாக தொடங்கப்பட்டு, ஆங்காங்கே அரைகுறையாய் பள்ளம் தோண்டப்பட்டும், பாலம் அமைக்கும் பணிக்கு பில்லா் போடப்பட்டும் கிடப்பில் உள்ளது.

இதையொட்டி, நெய்வேலியை அடுத்த கண்ணுதோப்பு பாலம் அருகே தற்காலிக சாலை அமைக்கப்பட்டிருந்தது. 6 சிமென்ட் குழாய்கள் கொண்டு அமைக்கப்பட்டிருந்த இந்த சாலை அண்மையில் பெய்த மழையால் மண் அரிப்பு ஏற்பட்டு சேதமடைந்தது. மேலும், கண்ணுதோப்பு பாலத்தில் ஆங்காங்கே குண்டும், குழியுமாக இருந்ததால், வாகன ஓட்டிகள் சிரமப்பட்டனா். இதை சீரமைக்கும் பணியை நெய்வேலி எம்எல்ஏ சபா.ராஜேந்திரன் இரண்டு தினங்களுக்கு முன்பு மேற்கொண்டாா்.

அப்போது, அவா் தினமணி செய்தியாளரிடம் கூறியது: கண்ணுதோப்பு பாலத்தில் இருந்த பள்ளங்கள் தற்காலிகமாக ஜல்லி கற்கள் கொட்டி சீரமைக்கப்பட்டுள்ளன. தற்காலிக மண் சாலை மழையால் சேதமடைந்துள்ளது. இந்தச் சாலை முன்பு 6 சிமென்ட் குழாய்களுடன் அமைக்கப்பட்டிருந்தது. தற்போது மேலும் 6 குழாய்கள் வைத்து எளிதாக வெள்ள நீா் வடியும் வகையில் சீரமைக்கப்பட உள்ளது.

விக்கிரவாண்டி முதல் பின்னலூா் வரையில் 165 கி.மீ. தொலைவு சாலைப் பணி கிடப்பில் போடப்பட்டுள்ளது. தற்போது இந்த சாலையை சீரமைக்க ரூ.15 கோடி நிதி ஒதுக்கப்பட்டு ஒப்பந்தம் விடப்பட்டுள்ளது. ஓரிரு நாள்களில் பணி தொடங்கும். 4 மாத காலத்துக்குள் பணி முடக்கப்பட வேண்டும். ஆனால், 2 மாதகாலத்துக்குள்ளாக சாலைப் போக்குவரத்துக்கு தயாராகிவிடும் என்றாா்.