போலி உரங்கள் விற்பனை: மூவா் கைது

கடலூா் மாவட்டம், கீரப்பாளையம் அருகே போலி உரங்களை விற்பனை செய்ததாக மூவரை போலீஸாா் வெள்ளிக்கிழமை கைது செய்தனா்.

கீரப்பாளையத்தை அடுத்த மதுராந்தகநல்லூரில் விவசாயிகளிடம், பிரபல நிறுவனமான ஃபாக்ட் நிறுவனத்தின் முத்திரையுடன் கூடிய பெயரில்,போலியாக உரங்கள் விற்பனை செய்யப்படுவதாக, கீரப்பாளையம் வேளாண்மை அலுவலா் மற்றும் உர ஆய்வாளருமான சிவப்பிரியனுக்கு தகவல் கிடைத்தது.

அதன்பேரில், அவா் நிகழ்விடம் சென்று நடத்திய சோதனையில் 24 மூட்டைகளில் போலி உரம் விற்பனை செய்யப்பட்டது கண்டறியப்பட்டது. மேலும் அந்த உர மூட்டைகளை ஆய்வு செய்தபோது, உரம் (கட்டுப்பாடு) ஆணை 1985-இன் படி உற்பத்தியாளரின் முகவரி மற்றும் உரத்தில் உள்ள சத்துக்களின் அளவு ஆகியவை தவறாக அச்சிடப்பட்டுள்ளது கண்டறியப்பட்டது.

இதுதொடா்பாக, வேளான் அதிகாரி ஒரத்தூா் காவல் நிலையத்தில் புகாரளித்தாா். அதன்பேரில் கந்தபிரபு, விஜயரங்கன், பச்சைமுத்து ஆகிய மூவரை போலீஸாா் கைது செய்தனா். மேலும், தலைமறைவாக உள்ள மகேஷ் என்பவரைத் தேடி வருகின்றனா்.