புகையிலைப் பொருள்கள் பறிமுதல்: மூவா் கைது

அண்ணாமலை நகா் காவல் சரகத்தில் புகையிலைப் பொருள்கள் விற்பனை செய்தவா் உள்பட மூவரை போலீஸாா் செவ்வாய்க்கிழமை கைது செய்தனா்.

கடலூா் மாவட்ட காவல் கண்காணிப்பாளா் ஆா்.ராஜாராம் உத்தரவின்பேரில், சிதம்பரம் கோட்ட காவல் துணைக் கண்காணிப்பாளா் டி.அகஸ்டின் ஜோஸ்வா லாமேக் மேற்பாா்வையில், அண்ணாமலை நகா் காவல் ஆய்வாளா் கே.அம்பேத்காா், உதவி ஆய்வாளா்கள் மகேஷ், கஜேந்திரன், மணிகண்டன், ஸ்ரீதா் ஆகியோா் செவ்வாய்க்கிழமை ராஜேந்திரன் சிலை அருகே வாகனத் தணிக்கையில் ஈடுபட்டிருந்தனா்.

அப்போது, அந்த வழியாக பைக்கில் வந்த மயிலாடுதுறை மாவட்டம், கொள்ளிடத்தைச் சோ்ந்த சுந்தரமூா்த்தி மகன் கலியமூா்த்தி (50) என்பவரை தடுத்து நிறுத்தி போலீஸாா் சோதனை செய்தனா். அப்போது, அவரது வாகனத்தில் விற்பனைக்காக கொண்டு சென்ற புகையிலைப் பொருள்களையும், ரூ.5.05 லட்சத்தையும் பறிமுதல் செய்தனா்.

மேலும், இவா் விற்பனை செய்த அண்ணாமலை நகா் சிவபுரி சாலையில் பெண்ணழகியின் (48) மளிகைக் கடை, வேளக்குடியைச் சோ்ந்த அண்ணாதுரை மளிகைக் கடையில் இருந்து தலா 100 பொட்டலங்களையும், சிதம்பரம் நகரில் ஓமக்குளம் அருகே உள்ள கலியமூா்த்தியின் சகோதரா் செல்வராஜின் வீட்டில் இருந்து சுமாா் 40 கிலோ புகையிலைப் பொருள்களையும் போலீஸாா் பறிமுதல் செய்தனா்.

இதையடுத்து, கலியமூா்த்தி, அண்ணாதுரை, பெண்ணழகி ஆகிய மூவரை போலீஸாா் கைது செய்தனா். செல்வராஜை தேடி வருகின்றனா்.