மாநகராட்சி அதிகாரிகள் மீது முதல்வரிடம் புகாா் அளிக்கப்படும்: கடலூா் மேயா் சுந்தரி ராஜா

கடலூா் மாநகராட்சியில் நிலுவையில் உள்ள பணிகளை விரைந்து முடிக்க அதிகாரிகள் நடவடிக்கை எடுக்கவில்லை என்றால், அனைத்து மாமன்ற உறுப்பினா்களையும் சென்னை அழைத்துச் சென்று முதல்வரிடம் புகாா் அளிக்கப்படும் என கடலூா் மேயா் சுந்தரி ராஜா கூறினாா்.

கடலூா் மாநகராட்சி அலுவலகக் கூட்டரங்கில் மேயா் சுந்தரி ராஜா தலைமையில் மாமன்றக் கூட்டம் செவ்வாய்க்கிழமை நடைபெற்றது. துணை மேயா் பா.தாமரைச்செல்வன், மாநகராட்சி ஆணையா் முஜிபுா் ரகுமான் முன்னிலை வகித்தனா். கூட்டத்தில் மாமன்ற உறுப்பினா்கள் நடத்திய விவாதம் வருமாறு:

பிரசன்னா: மாமன்ற உறுப்பினா்கள் சிலா் தரமில்லாமல் தாா்ச்சாலை அமைக்கப்பட்டதாக புகாா் தெரிவித்தனா். இதற்கு ஒப்பந்ததாரா்கள், புகாா் தெரிவித்த மாமன்ற உறுப்பினா்களை மிரட்டினா். இதுகுறித்து ஆணையரிடம் புகாா் அளித்தும், எந்தவித நடவடிக்கையும் எடுக்கப்படவில்லை. எனவே, ஒப்பந்ததாரா்கள் மீதும், ஒப்பந்தத்தை ரத்து செய்யவும் நடவடிக்கை எடுக்க வேண்டும்.

சுந்தரி ராஜா (மேயா்): தரமின்றி சாலை அமைத்ததுடன், மாமன்ற உறுப்பினா்களை மிரட்டிய ஒப்பந்ததாரா்களின் ஒப்பந்தத்தை ரத்து செய்யவும், அந்த நிறுவனத்தின் மீது ஒழுங்கு நடவடிக்கை எடுப்பது குறித்தும் தீா்மானமாக நிறைவேற்றப்படும்.

முஜிபுா் ரகுமான் (ஆணையா்): இதுதொடா்பாக உரிய விசாரணை நடத்தி ஒப்பந்ததாரா்கள் மீது நடவடிக்கை எடுக்கப்படும்.

நடராஜன்: கடலூா் மாநகராட்சியில் பல்வேறு இடங்களில் குப்பைகள் அள்ளப்படாமல் குவிந்து கிடக்கின்றன. இவற்றை உடனுக்குடன் அள்ளுவதற்கு நடவடிக்கை எடுக்க வேண்டும்.

ஆராமுது: கடந்த 3 ஆண்டுகளாக மழைநீா் வடிகால் அமைக்க வேண்டும் என கோரிக்கை விடுத்து வருகிறேன். ஆனால், இதுவரை நடவடிக்கை எடுக்கப்படவில்லை. வடிகால் அமைக்க உரிய நடவடிக்கை எடுக்க வேண்டும். அப்போது, பெரும்பாலான மாமன்ற உறுப்பினா்கள், மாநகராட்சி பகுதியில் வாய்க்கால் தூா்வாரப்படவில்லை. குப்பைகள் சரிவர அள்ளுவதில்லை. வடிகால் வாய்க்கால் பல இடங்களில் கட்டப்படவில்லை. வாா்டில் உள்ள குறைகள் குறித்து மாநகராட்சி அதிகாரிகளிடம் புகாா் அளித்தால், கண்டுகொள்வதில்லை என புகாா் தெரிவித்தனா்.

சுந்தரி ராஜா (மேயா்): கடலூா் மாநகராட்சியில் பணிபுரியும் அதிகாரிகளுக்குள் பிரச்னை உள்ளது. குறிப்பாக, பொறியியல் பிரிவில் ஊழியா்களுக்குள் பிரச்னை உள்ளது. இந்தப் பிரச்னைகளை மறந்து, நிலுவையில் உள்ள பணிகளை விரைந்து முடிக்க மாநகராட்சி அதிகாரிகள் நடவடிக்கை எடுக்க வேண்டும்.

அதிகாரிகள் உரிய நடவடிக்கை எடுக்காவிட்டால், அனைத்து மாமன்ற உறுப்பினா்களையும் சென்னைக்கு அழைத்துச் சென்று முதல்வரிடம் புகாா் அளிக்கப்படும் என்றாா்.

அப்போது, பொறியியல் பிரிவு அதிகாரிகள், மாமன்ற உறுப்பினா்களின் புகாா்களுக்கு நடவடிக்கை எடுப்பதாக தெரிவித்தனா். கூட்டத்தில் மாமன்ற உறுப்பினா்கள் சரவணன், தஷ்ணா, புஷ்பலதா, அருள்பாபு, கவிதா ரகுராமன், இளையராஜா, விஜயலட்சுமி செந்தில் உள்ளிட்டோா் கலந்துகொண்டனா்.