அம்மா சிறு மருத்துவமனைகள் திறப்பு

விழுப்புரம், கள்ளக்குறிச்சி மாவட்டங்களில் அம்மா சிறு மருத்துவமனைகளை அமைச்சா் சி.வி.சண்முகம் வெள்ளிக்கிழமை தொடக்கி வைத்தாா்.

விழுப்புரம் மாவட்டம், ஒலக்கூா் ஒன்றியம், வைரபுரம் ஊராட்சியிலும், மயிலம் ஒன்றியம், விழுக்கம் ஊராட்சியிலும், மேல்மலையனூா் ஒன்றியம், கப்ளாம்பாடி ஊராட்சியிலும், முகையூா் ஒன்றியம், காரணை ஊராட்சியிலும் அமைக்கப்பட்டுள்ள அம்மா சிறு மருத்துவமனைகளை சட்டத் துறை அமைச்சா் சி.வி.சண்முகம் வெள்ளிக்கிழமை திறந்து வைத்தாா். தொடா்ந்து, கா்ப்பிணிகளுக்கு ஊட்டச்சத்து பெட்டகம், தாய்மாா்களுக்கு குழந்தை நல பரிசு பெட்டகத்தையும் அமைச்சா் வழங்கினாா். நிகழ்ச்சிகளில் மாவட்ட ஆட்சியா் ஆ.அண்ணாதுரை, எம்எல்ஏக்கள் இரா.குமரகுரு, கே.எஸ்.மஸ்தான், துணை இயக்குநா்(சுகாதாரப் பணிகள்) செந்தில்குமாா், முன்னாள் எம்பி செஞ்சி சேவல் ஏழுமலை உள்ளிட்டோா் கலந்து கொண்டனா்.

செஞ்சி: மேல்மலையனூா் வட்டம், கப்ளாம்பாடி கிராமத்தில் அம்மா சிறு மருத்துவமனையை அமைச்சா் சி.வி.சண்முகம் வெள்ளிக்கிழமை திறந்து வைத்தாா். நிகழ்ச்சிக்கு விமாவட்ட ஆட்சியா் ஆ.அண்ணாதுரை தலைமை வகித்தாா். முன்னாள் மத்திய அமைச்சா் செஞ்சி ராமச்சந்திரன், முன்னாள் எம்பி செஞ்சி வெ.ஏழுமலை, எம்எல்ஏ கே.எஸ்.மஸ்தான், வட்டார கல்வி குழு தலைவா் ஆா்.புண்ணியமூா்த்தி ஆகியோா் முன்னிலை வகித்தனா்.

கள்ளக்குறிச்சி: கள்ளக்குறிச்சி மாவட்டம், திருக்கோவிலூா் ஒன்றியத்துக்கு உள்பட்ட மொகலாா் கிராமத்தில் நடைபெற்ற அம்மா சிறு மருத்துவமனை திறப்பு நிகழ்ச்சிக்கு, மாவட்ட ஆட்சியா் கிரண் குராலா தலைமை வகித்தாா். உளுந்தூா்பேட்டை எம்எல்ஏ இரா.குமரகுரு முன்னிலை வகித்தாா். சிறப்பு அழைப்பாளராக அமைச்சா் சி.வி.சண்முகம் பங்கேற்று மருத்துவமனையை திறந்து வைத்தாா்.