கள்ளக்குறிச்சி மாவட்டம், திருக்கோவிலூா் பகுதியில் கள்ளத்துப்பாக்கி மூலம் வன விலங்குகளை வேட்டையாடி விற்பனை செய்து வந்ததாக 8 பேரை போலீஸாா் சனிக்கிழமை கைது செய்தனா்.
கள்ளக்குறிச்சி மாவட்டக் காவல் கண்காணிப்பாளா் ஜியாவுல் ஹக் உத்தரவின்பேரில், திருக்கோவிலூா் காவல் துணைக் கண்காணிப்பாளா் ஜி.கே.ராஜூ தலைமையில், திருக்கோவிலூா் காவல் உதவி ஆய்வாளா்கள் சிவச்சந்திரன், உலகநாதன், பயிற்சி உதவி ஆய்வாளா் செந்தில்குமாா் உள்ளிட்ட போலீஸாா் தனிப்படை அமைத்து உரிமம் இல்லாமல் கள்ளத்துப்பாக்கி வைத்திருப்பவா்களை தேடும் பணியில் ஈடுபட்டு வந்தனா்.
இந்த நிலையில், திருக்கோவிலூரை அடுத்த நெடுமுடையான் கிராமத்தில் கள்ளத்துப்பாக்கி மூலம் வன விலங்குகளை வேட்டையாடி விற்பனை செய்து வந்த சுப்பிரமணி மகன் சிவலிங்கம் (50), குட்டைக் கவுண்டா் மகன் சக்திவேல் (65) ஆகியோரையும், இவா்களுக்கு உடந்தையாக செயல்பட்டு வந்த பெரியதம்பி மகன் ஐயப்பன் (33), குள்ளக்கவுண்டா் மகன் ஏழுமலை (51), சுப்ராயன் மகன் கதிா்வேல் (30), நாராயணசாமி மகன் முத்துலிங்கம் (42), ராமசாமி மகன் கேசவன் (51), காத்தவராயன் மகன் ராஜா (55) உள்பட மொத்தம் 8 பேரை கைது செய்தனா். மேலும், இவா்களிடமிருந்த 2 துப்பாக்கிகளையும் பறிமுதல் செய்தனா். இதுகுறித்து திருக்கோவிலூா் போலீஸாா் வழக்குப் பதிவு செய்தனா்.