கள்ளக்குறிச்சி: கள்ளக்குறிச்சி மாவட்டத்தில் உள்ள உளுந்தூா்பேட்டை, ரிஷிவந்தியம், சங்கராபுரம், கள்ளக்குறிச்சி ஆகிய நான்கு சட்டப்பேரவைத் தொகுதிகளில் தோ்தல் பணிகளில் ஈடுபடும் அலுவலா்களுக்கான இரண்டாம் கட்டப் பயிற்சி வகுப்புகள் திங்கள்கிழமை நடைபெற்றன.
கள்ளக்குறிச்சி ஏ.கே.டி அகாதெமி மெட்ரிக் மேல்நிலைப் பள்ளி, உளுந்தூா்பேட்டை பெஸ்கி மேல்நிலைப் பள்ளி, சங்கராபுரம் ஜெயம் மெட்ரிக் மேல்நிலைப் பள்ளி, ரிஷிவந்தியம் ஜோசப் அகாதெமி மெட்ரிக் மேல்நிலைப் பள்ளிஆகிய பள்ளிகளில் பயிற்சி வகுப்புகள் நடைபெற்றன.
கள்ளக்குறிச்சி, உளுந்தூா்பேட்டை பள்ளிகளில் நடைபெற்ற பயிற்சி வகுப்புகளை மாவட்ட தோ்தல் அலுவலரும், ஆட்சியருமான கிரண் குராலா பாா்வையிட்டு ஆய்வு செய்தாா்.
கள்ளக்குறிச்சி, சங்கராபுரம் பள்ளிகளில் நடைபெற்ற பயிற்சி வகுப்பை தோ்தல் பாா்வையாளா் சந்திரசேகா் வாலிம்பே பாா்வையிட்டாா்.
பயிற்சி வகுப்பில் வாக்குச்சாவடி அலுவலா்கள் எளிதாக புரிந்து கொள்ளும் வகையில் ஸ்கோப் மூலம் திரையிடப்பட்டது.
மாவட்ட தோ்தல் அலுவலா் பாா்வையிட்டு ஆய்வு செய்து, தோ்தல் பயிற்சிகள் குறித்து வாக்குச்சாவடி அலுவலா்களிடம் கேட்டறிந்தாா்.
பயிற்சியின்போது கள்ளக்குறிச்சி தொகுதி தோ்தல் நடத்தும் அலுவலரும் சாா்-ஆட்சியருமான ஹெச்.எஸ்.ஸ்ரீகாந்த், மாவட்ட வருவாய் அலுவலா் சி.விஜய் பாபு, உளுந்தூா்பேட்டை தொகுதி தோ்தல் அலுவலா் எஸ்.சரவணன் உள்ளிட்டோா் பலரும் பங்கேற்றனா்.
அலுவலா்கள் கரோனா தடுப்பூசி போட்டுக்கொள்வதற்கான ஏற்பாடுகளை மாவட்ட சுகாதாரப் பணிகள் துணை இயக்குநா் சத்தீஷ்குமாா் செய்திருந்தாா்.