சுடச்சுட

    

    விவசாயிகளுக்கு ஆதரவாகப் போராடிய செல்வம் எம்.எல்.ஏ. மீது போலீஸார் தாக்குதல் நடத்தியதற்கு அதிமுக கண்டனம் தெரிவித்தது.
    இதுதொடர்பாக அந்தக் கட்சியின் எம்.எல்.ஏ. வையாபுரி மணிகண்டன் வெளியிட்ட அறிக்கை: புதுச்சேரியை ஆளும் காங்கிரஸ் தலைமையிலான அரசு கடந்த 15 மாதங்களில் எந்தவொரு நலத் திட்டத்தையும் செயல்படுத்தவில்லை. சென்டாக் மாணவர் சேர்க்கையில் முறைகேடு, அரசு ஊழியர்களுக்கு 7-ஆவது ஊதியக் குழு நிலுவைத் தொகையை வழங்காதது, பொதுத் துறை, கூட்டுறவுத் துறை, அரசு சார்பு நிறுவனங்களில் பணியாற்றும் ஊழியர்களுக்கு சம்பளம் வழங்காதது, உள்ளாட்சி அமைப்புகளான நகராட்சி, கொம்யூன் பஞ்சாயத்து ஊழியர்களுக்கு 7-ஆவது ஊதியக் குழு பரிந்துரையை அமல்படுத்தாதது, மீனவர்களின் வாழ்வாதாரத்தை அழித்து மீன்பிடி தொழிலை முடக்கம் செய்தது, தாழ்த்தப்பட்டோருக்கு எந்த நலத் திட்டத்தையும் வழங்காதது, பிற்படுத்தப்பட்டோர் நலத் துறையைப் பெயரளவில் செயல்படுத்துவது என அனைத்துத் தரப்பு மக்களையும் ஆளும் காங்கிரஸ் அரசு வாட்டி வதைத்து வருகிறது. இதற்கெல்லாம் மனசாட்சிப்படி தார்மிக பொறுப்பேற்று முதல்வர் நாராயணசாமி பதவி விலகியிருக்க வேண்டும்.
    பொதுமக்கள் தங்களின் கோரிக்கைகளுக்காக தார்மிக ரீதியில் போராட்டம் நடத்த முன் வந்தால், அதை நசுக்கும் வேலைகளில் காங்கிரஸ் அரசு ஈடுபட்டு வருகிறது. சர்க்கரை ஆலைக்கு வழங்கிய கரும்புக்கான நிலுவைத் தொகையை கேட்ட விவசாயிகளை போலீஸார் தடியடி நடத்தி விரட்டியடித்துள்ளனர்.
    விவசாயிகளுக்காக குரல் கொடுத்த மண்ணாடிப்பட்டு தொகுதி எம்.எல்.ஏ. செல்வத்தையும் கண் மூடித்தனமாகத் தாக்கி, அவரது சட்டையைக் கிழித்துள்ளனர். இதை அதிமுக வன்மையாகக் கண்டிக்கிறோம்.
    இனியும் இந்த ஆட்சி தொடர வேண்டுமா என்பதை புதுச்சேரி மக்கள்தான் முடிவு செய்ய வேண்டும். சட்டப்பேரவை உறுப்பினரையே தாக்கி, அவமதித்து ஜனநாயகத்தைக் கேலிக் கூத்தாக்கிய இந்த அரசின் செயல்பாட்டை மத்திய அரசு வேடிக்கை பார்க்காமல் உடனடியாக முடக்கம் செய்ய வேண்டும் என்றார் அவர்.

     

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai