Enable Javscript for better performance
கோடை விடுமுறைக்குப் பிறகு பள்ளிகள் திறப்பு- Dinamani

சுடச்சுட

    

    கோடை விடுமுறை முடிந்து புதுவையில் பள்ளிகள் திங்கள்கிழமை திறக்கப்பட்டதால் மாணவ, மாணவிகள் முதல் நாளில் உற்சாகமாக வந்தனர்.
    தமிழகத்தில் ஜூன் 1-ஆம் தேதி பள்ளிகள் அனைத்தும் திறக்கப்பட்ட நிலையில், புதுவையில் கோடை விடுமுறை முடிந்து புதுச்சேரியில் அரசு- நிதியுதவி மற்றும் பெரும்பாலான தனியார் பள்ளிகள் திங்கள்கிழமை திறக்கப்பட்டன. 
    மாணவ- மாணவிகள் பள்ளிக்கு ஆர்வமுடன் சென்றனர். சில குழந்தைகள் விடுமுறை கொண்டாட்டத்திற்குப் பின் பள்ளி செல்ல அடம்பிடித்ததையும், அக்குழந்தைகளை பெற்றோர், பள்ளியில் வலுக்கட்டாயமாக விட்டுச் சென்றதையும் காணமுடிந்தது. முதல்நாளில் பெரும்பாலான தனியார் பள்ளிகள் அரைநாள் மட்டுமே இயங்கின. ஆனால் அரசுப் பள்ளிகள் வழக்கம்போல் முழுநேரம் செயல்பட்டன. 
    அரசுப் பள்ளிகளில் மாணவ- மாணவிகளுக்கு முதல்நாளிலே நோட்டு- புத்தகங்கள் விநியோகிக்கப்பட்டன. முதன்முதலாக வந்த குழந்தைகளுக்கு பள்ளிகளில் கொடி தோரணங்கள் கட்டி உற்சாக வரவேற்பு அளிக்கப்பட்டது. மேலும், புதிய மாணவர்கள் சேர்க்கையும் நடைபெற்றன. 
    இதேபோல, காரைக்காலிலும் கோடை விடுமுறை முடிந்து அரசு மற்றும் நிதியுதவி, தனியார் பள்ளிகள் திறக்கப்பட்டன. மாணவ- மாணவிகள் உற்சாகமாக பள்ளிகளுக்கு சென்றனர்.
    அதேநேரத்தில் மாஹே பிராந்தியத்தில் கோடை விடுமுறைக்குபின் ஜூன் 6-ஆம் தேதி பள்ளிகள் திறக்கப்படும் என அறிவிக்கப்பட்ட நிலையில் நிபா வைரஸ் பாதிப்பு காரணமாக ஜூன் 
    12-ஆம் தேதி பள்ளி திறக்கப்படும் என மாஹே முதன்மை கல்வி அலுவலர் உத்தமராசா அறிவித்துள்ளார். 
    இதேபோல, புதுவையில் சில தனியார் பள்ளிகள் புதன்கிழமை (ஜூன் 6) மற்றும் 13-ஆம் தேதி திறக்கப்பட உள்ளன.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai