Enable Javscript for better performance
ஜிப்மர் எம்பிபிஎஸ் நுழைவுத் தேர்வில் மாநில ஒதுக்கீட்டில் முறைகேடு: விசாரணை நடத்த திமுக கோரிக்கை- Dinamani

சுடச்சுட

    

    ஜிப்மர் எம்பிபிஎஸ் நுழைவுத் தேர்வில் மாநில ஒதுக்கீட்டில் முறைகேடு: விசாரணை நடத்த திமுக கோரிக்கை

    By  புதுச்சேரி,  |   Published on : 13th June 2018 08:15 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    ஜிப்மர் எம்பிபிஎஸ் நுழைவுத் தேர்வில் புதுவை மாநில இட ஒதுக்கீட்டில் முறைகேடு நடந்துள்ளதாக புகார் எழுந்துள்ளதால், இது தொடர்பாக விசாரணை நடத்த வேண்டும் என்று முதல்வர் வே.நாராயணசாமியிடம் திமுக கோரிக்கை மனு அளித்தது.
     இதுகுறித்து புதுவை தெற்கு மாநில திமுக அமைப்பாளர் இரா.சிவா எம்.எல்.ஏ. தலைமையில் மாணவர்கள் செவ்வாய்க்கிழமை கொடுத்த மனு விவரம்:
     புதுவை ஜிப்மர் எம்பிபிஎஸ் நுழைவுத் தேர்வு முடிவுகள் ஜூன் 8-ஆம் தேதி வெளியிடப்பட்டது. இதில், புதுவை மாணவர்களுக்கான இட ஒதுக்கீட்டில் முறைகேடு நடந்துள்ளதாக ஒரு சில மாணவர் அமைப்புகள் சந்தேகம் எழுப்பியுள்ளன. இதில் உண்மை இருப்பதாக திமுக உணர்கிறது.
     புதுவையில் செயல்பட்டு வரும் ஜிப்மர் மற்றும் பல்கலைக் கழகங்களில் உள்ள புதுவை மாணவர்களுக்கான இடங்களை ஒரு சிலர் குறுக்கு வழியில் பெற்று வருகின்றனர். குறிப்பாக, புதுவை மாநில குடியுரிமை பெற 5 ஆண்டுகள் புதுவையில் இருந்திருக்க வேண்டும். மத்திய அரசு ஊழியர்கள் இரண்டு ஆண்டுகள் இருந்தால் அவர்களுக்கு குடியுரிமை வழங்கப்படுகிறது.
     இதை சாதகமாக பயன்படுத்தும் மத்திய அரசு ஊழியர்கள் புதுவை மாநிலத்துக்கு வெறும் இரண்டு ஆண்டுகள் மட்டும் இடமாற்றம் பெற்று வந்து தங்களுக்கு உள்ள இட ஒதுக்கீட்டை பயன்படுத்தி, புதுவை மாநில மாணவர்களின் இடங்களை குறுக்கு வழியில் பெறுகின்றனர்.
     இதனால் இட ஒதுக்கீடு முறையை பெரிதும் நம்பியுள்ள புதுவை மாநில மாணவர்கள் பெருமளவில் பாதிக்கப்படுகின்றனர்.
     புதுச்சேரி மற்றும் காரைக்கால் பகுதியில் செயல்பட்டு வரும் ஜிப்மர் மருத்துவக் கல்லூரியில் 200 மாணவர்கள் தேர்வு செய்யப்படுகின்றனர். இதில், புதுவை மாணவர்களுக்கென 31 இடங்கள் பொதுப் பட்டியலுக்கும், 13 மாணவர்கள் இதர பிற்படுத்தப்பட்ட பட்டியலுக்கும், 6 தாழ்த்தப்பட்ட பட்டியலுக்கும், 4 பழங்குடியின பட்டியலுக்கும் என மொத்தம் 54 இடங்கள் ஒதுக்கப்படுகின்றன.
     இந்த இடங்கள் மொத்தமாக புதுவை மாணவர்களுக்கு கிடைப்பது இல்லை. இந்த நிலை மாற அரசு உடனடி நடவடிக்கை எடுக்க வேண்டும். ஏற்கெனவே நீட் தேர்வால் ஏழை மாணவர்கள் மருத்துவக் கல்வி பெறும் வாய்ப்பை இழந்து வருகின்றனர். தற்போது ஜிப்மர் நிர்வாகத்திலும் கண்ணுக்கு தெரியாமல் புதுவை மாணவர்கள் உரிமை பறிக்கப்படுகிறது.
     எனவே, இந்தக் கல்வி ஆண்டு ஜிப்மர் மருத்துவக் கல்லூரியில் புதுவையைச் சேர்ந்தோர் எத்தனை பேர் தேர்வு செய்யப்பட்டனர் என்பதை அரசு ஆய்வு செய்து வெள்ளை அறிக்கை வெளியிட வேண்டும். ஜிப்மர் நிர்வாகம் தேர்வு செய்துள்ள மாணவர்கள் பட்டியலில் புதுவை மாணவர்களுக்கு வழங்கப்பட்டுள்ள இடஒதுக்கீடு இடங்கள் முறையாக வழங்கப்பட்டுள்ளதா? இல்லையா? என மாவட்ட ஆட்சியர் தலைமையில் குழு அமைத்து விசாரணை நடத்த வேண்டும் எனத் தெரிவித்துள்ளனர்.
     
     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai