Enable Javscript for better performance
மருத்துவம், பொறியியல் படிப்புகள்: பிராந்திய இட ஒதுக்கீடு அடிப்படையில் மாணவர் சேர்க்கைக்கு எதிர்ப்பு- Dinamani

சுடச்சுட

    

    மருத்துவம், பொறியியல் படிப்புகள்: பிராந்திய இட ஒதுக்கீடு அடிப்படையில் மாணவர் சேர்க்கைக்கு எதிர்ப்பு

    By DIN  |   Published on : 17th June 2018 05:11 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    மருத்துவம், பொறியியல் படிப்புகளில் பிராந்திய இட ஒதுக்கீடு அடிப்படையில், மாணவர் சேர்க்கை நடத்தக் கூடாது என புதுச்சேரி மாநில மாணவர், பெற்றோர் நலச் சங்கத் தலைவர் பாலசுப்ரமணியன் தெரிவித்தார்.
    இதுகுறித்து சென்டாக் நிர்வாகத்திடம் வெள்ளிக்கிழமை அவர் அளித்த மனுவின் விவரம்:
    புதுவை மாநிலத்தில் நீட் தேர்வை 4 ஆயிரத்துக்கும் மேற்பட்டோர் எழுதினர். இவர்களில் 1,768 பேர் தேர்ச்சி பெற்றுள்ளனர். புதுவைக்கான நீட் தரவரிசைப் பட்டியலில் முதல் மதிப்பெண் 550, 2-ஆவது மதிப்பெண் 503, 3-ஆவது மதிப்பெண் 498 ஆகும். இந்த மதிப்பெண்களைப் பெற்ற மாணவர்கள் அனைவரும் சி.பி.எஸ்.இ. பாடத் திட்டத்தில் படித்தவர்கள்.
    இந்த நிலையில், புதுச்சேரி, காரைக்கால் பகுதிகளில் உள்ள அரசு, அரசு உதவி பெறும் மருத்துவக் கல்லூரிகளில் கடந்தாண்டு 3 மாணவர்களே அரசு மருத்துவக் கல்லூரிகளில் இடம் பெற்றனர். அதேபோல, நிகழாண்டு நீட் மதிப்பெண்கள் அடிப்படையில் சென்டாக் கலந்தாய்வில் மிகக் குறைவான எண்ணிக்கையில் அரசுப் பள்ளி மாணவர்கள் இந்திரா காந்தி மருத்துவக் கல்லூரி, மகாத்மா காந்தி அரசு பல் மருத்துவக் கல்லூரிகளில் இடம் பெறுவார்கள் எனத் தெரிய வருகிறது.
    பெரும்பாலும் 300-க்கும் மேற்பட்ட மாணவர்கள் 300 முதல் 250 மதிப்பெண்கள் பெற்றவர்களாகவே உள்ளனர்.
    புதுவை மாநிலத்தில் உள்ள மாஹே, ஏனாம் பிராந்தியங்களில் உள்ள பள்ளிகள் பெரும்பாலும் சி.பி.எஸ்.இ. பாட முறையில் உள்ளது. அங்கு படித்த மாணவர்கள் நீட் தேர்வில் அதிக மதிப்பெண்கள் பெற்றுள்ளனர். உச்ச நீதிமன்றத்தால் கொண்டு வரப்பட்ட நீட் தேர்வின் அடிப்படையில், மாணவர்களைச் சேர்த்துக் கொள்ள வேண்டும்.
    பல்வேறு மாநில அரசுகளால் பின்பற்றப்படும் இட ஒதுக்கீட்டு கொள்கையின்படி சென்டாக் நிர்வாகம் மாணவர் சேர்க்கை கலந்தாய்வை நடத்தலாம்.
    புதுவை மாநிலத்தில் புதுச்சேரி பகுதியைச் சேர்ந்த மாணவர்களுக்கு ஒரு கட் ஆப், காரைக்கால், ஏனாம், மாஹே பகுதிகளைச் சேர்ந்த மாணவர்களுக்கு ஒரு கட் ஆப் என மருத்துவ இடங்களை நிரப்புவது நீட் விதிகளுக்கு முரணானது.
    எனவே, சென்டாக் நிர்வாகம் நீட் மதிப்பெண்கள் அடிப்படையிலும், புதுச்சேரி அரசால் பின்பற்றப்படும் 69 சதவீத இட ஒதுக்கீடு கொள்கையின் அடிப்படையிலும், மாணவர்களின் தரவரிசைப் பட்டியலை வெளியிட வேண்டும். இதில் பிராந்திய ஒதுக்கீட்டுக்கென எவ்வித சலுகையும் வழங்கக் கூடாது.
    புதுவை அரசு, நிகழாண்டு அரசுக் கல்லூரிகளில் உள்ள மருத்துவம், பல் மருத்துவம், பொறியியல் இடங்களுக்கான மாணவர் சேர்க்கையை பிராந்திய இட ஒதுக்கீடு அடிப்படையில் நடத்தக் கூடாது. இதை ரத்து செய்ய வேண்டும். இதுதொடர்பாக சென்னை உயர் நீதிமன்றத்தை அணுகி உரிய ஆணையைப் பெற வேண்டும்.
    மேலும், இந்திரா காந்தி அரசு மருத்துவக் கல்லூரிக்கு தேவையான நிதியை ஒதுக்க வேண்டும். நிகழாண்டு நீட் தேர்வுக்கான பயிற்சி வகுப்புகளை திறமையான ஆசிரியர்களைக் கொண்டு நடத்தி அரசுப் பள்ளி மாணவர்களின் மருத்துவக் கனவை நனவாக்க வேண்டும் என அந்த மனுவில் தெரிவிக்கப்பட்டுள்ளது.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai