Enable Javscript for better performance
சென்டாக் கலந்தாய்வுக்கு ஆதார் கட்டாயம்: நீதிமன்ற தீர்ப்பை அமல்படுத்தக் கோரிக்கை- Dinamani

சுடச்சுட

    

    சென்டாக் கலந்தாய்வுக்கு ஆதார் கட்டாயம்: நீதிமன்ற தீர்ப்பை அமல்படுத்தக் கோரிக்கை

    By  புதுச்சேரி,  |   Published on : 24th June 2018 03:23 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    சென்டாக் கலந்தாய்வுக்கு ஆதார் அட்டை கட்டாயம் என்ற சென்னை உயர் நீதிமன்ற உத்தரவை புதுவை அரசு உடனடியாக அமல்படுத்த வேண்டும் என்று புதுச்சேரி மாநில மாணவர் மற்றும் பெற்றோர் நலச் சங்கம் கோரிக்கை விடுத்துள்ளது.
     இது குறித்து அந்தச் சங்கத்தின் தலைவர் வை. பாலா, சென்டாக் ஒருங்கிணைப்பாளர் ருத்ர கெüடுவுக்கு சனிக்கிழமை அனுப்பியுள்ள மனு விவரம்:
     புதுச்சேரி, காரைக்கால் பகுதிகள் தமிழகம், மாஹே பகுதி கேரளம், ஏனாம் பகுதி ஆந்திர மாநில எல்லையையொட்டி இருக்கின்றன. இதனால், புதுவை மாநிலத்தைச் சேராத பிற மாநில மாணவர்கள் புதுவையில் உள்ள பள்ளிகளில் தொடர்ந்து 5 ஆண்டுகளுக்கு மேல் படித்து இருப்பிட சான்றிதழ் பெறுகின்றனர்.
     அதன் மூலம் புதுவை மாநில மாணவர்களுக்கு சேர வேண்டிய மருத்துவ இடங்களை குறுக்கு வழியில் பல ஆண்டுகளாக தட்டிப் பறித்து வருகின்றனர். தமிழக மாணவர்களால் தொடரப்பட்ட வழக்கில் சென்னை உயர் நீதிமன்ற நீதிபதி கிருபாகரன் வெள்ளிக்கிழமை பிறப்பித்த உத்தரவில், பிற மாநில மாணவர்கள் தமிழக அரசின் மருத்துவ ஒதுக்கீட்டு இடங்களை தட்டிப் பறிப்பதை தடுத்து நிறுத்த ஆதார் அட்டையை மாணவர் சேர்க்கையின் போது சமர்ப்பிக்க வேண்டுமென உத்தரவு பிறப்பித்துள்ளார்.
     புதுவையில் அரசு மற்றும் தனியார் மருத்துவக் கல்லூரிகளில் குறைவான மருத்துவ இடங்களே உள்ளன. எனவே, சென்டாக் அரசு ஒதுக்கீட்டில் கலந்தாய்வில் இடம் பெறும் மாணவர்கள் அசல் ஆதார் அட்டையை சமர்ப்பிக்க வேண்டும். தற்போது சென்டாக் மூலம் விண்ணப்பித்த அனைத்து மாணவர்களின் விண்ணப்பங்கள் மற்றும் இருப்பிட சான்றிதழ், சாதி சான்றிதழ் அனைத்துமே வருவாய்த் துறை அதிகாரிகள் ஆய்வு செய்துள்ளனர்.
     இருப்பினும், பிற மாநில (தமிழ்நாடு, ஆந்திரம், கேரளம்) மாணவர்கள் புதுவை மாநிலத்தில் உள்ள பள்ளிகளில் கடைசி 5 ஆண்டு படித்ததன் மூலம் இருப்பிட சான்றிதழ் பெற்றிருப்பதால், ஆதார் அட்டையை அரசு ஒதுக்கீட்டில் மருத்துவம் மற்றும் பல் மருத்துவப் படிப்பில் சேரும் மாணவர்களுக்கு கட்டாயமாக்க வேண்டும்.
     அப்போது, தவறுகள் முற்றிலும் அகற்றப்பட்டு புதுவை மாணவர்களே கலந்தாய்வு மூலம் சேர்க்கை பெறும் நிலை உருவாகும் எனத் தெரிவித்துள்ளார்.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai