Enable Javscript for better performance
தனியார் கல்லூரிகளில் அரசு ஒதுக்கீடு இடங்களைப் பெற தனிச் சட்டம் இயற்ற வலியுறுத்தல்- Dinamani

சுடச்சுட

    

    தனியார் கல்லூரிகளில் அரசு ஒதுக்கீடு இடங்களைப் பெற தனிச் சட்டம் இயற்ற வலியுறுத்தல்

    By DIN  |   Published on : 25th June 2018 09:53 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    புதுவையில் தனியார் கல்லூரிகளில் அரசு ஒதுக்கீடு வழங்க தனிச் சட்டம் இயற்ற வேண்டும் என்று புதுச்சேரி யூனியன் பிரதேச அனைத்து சென்டாக் மாணவர்கள் பெற்றோர்கள் நலச்சங்கம் வலியுறுத்தியுள்ளது. 
    இதுகுறித்து புதுவை முதல்வர் வே.நாராயணசாமி,  புதுவை அரசின் கல்வித்துறைச் செயலர் அன்பரசு ஆகியோருக்கு இந்த சங்கத்தின் தலைவர் மு.நாராயணசாமி சனிக்கிழமை அனுப்பியுள்ள மனு விவரம்:
    புதுவையில் பிராந்திய இட ஒதுக்கீட்டை ரத்து செய்ய வேண்டும். இதுவரை வழங்கப்படாமல் உள்ள சென்டாக் நிதியை உடனடியாக கொடுக்க வேண்டும்.  சென்டாக்  மூலம்  அரசு இட ஒதுக்கீட்டுக்கு தனியார் கல்லூரிகளில் இடங்களைப் பெற தனிச் சட்டம் இயற்ற வேண்டும். 
    2018-19-ஆம் ஆண்டுக்கு சென்டாக்  மூலம் தேர்ந்தெடுக்கப்படும் மாணவர்களுக்கு  சென்டாக்  நிதி உண்டா, இல்லையா என்பதை அரசு அறிவிக்க வேண்டும்.  புதுவை மாணவர்கள் சென்டாக் மூலம் மருத்துவம் படிக்க பதிவு செய்த மாணவர்களின் தரவரிசைப்பட்டியல் வெளியிட காலம் தாழ்த்துவதாலும்,  கல்விக் கட்டணம், அரசு இடஒதுக்கீட்டு இடங்கள் எத்தனை என்று அறிவிக்காமல் உள்ளதால் மாணவர்களும்,  பெற்றோர்களும் மருத்துவப் படிப்பு புதுவையில் கிடைக்குமா,  கிடைக்காதா என்ற குழப்பத்தில் உள்ளனர்.
    புதுவை அரசு,  கல்விக் கட்டணம் எவ்வளவு,  அரசு இடஒதுக்கீடு எவ்வளவு என்றும், அறிவித்து தரவரிசைப் பட்டியல் வெளியிடப்படும் என்றும் அறிவிக்க வேண்டும்.   மருத்துவ கவுன்சில் கமிட்டி  (MCC)  அகில இந்திய இட ஒதுக்கீட்டுக்கும், நிகர்நிலையில் (D‌e‌e‌m‌e‌d U‌n‌i‌v‌e‌r‌s‌i‌t‌y) உள்ள மருத்துவ இடங்களுக்கும் முதல் கட்ட கலந்தாய்வு நடத்தி முடிக்கப்பட்டுள்ளது. இதில், புதுவை மாநில மாணவர்கள் பலருக்கு இடம் கிடைத்துள்ளது.  முதல் கட்ட கலந்தாய்வில் இடம் கிடைத்த மாணவர்கள் ஜூலை 3-ஆம் தேதிக்குள் கல்லூரியில் சேர வேண்டும் என்ற ஆணை பிறப்பித்துள்ளது.
    இரண்டாம் கட்ட கலந்தாய்வு வருகிற ஜூலை 13-ஆம் தேதி நடைபெற உள்ளது. இரண்டாம் கட்ட கலந்தாய்விலும்  மாணவர்களுக்கு இட ஒதுக்கீட்டில் இடம் கிடைத்து சேரவில்லை என்றால் மாணவர்கள் விண்ணப்பிக்கும்போது கட்டிய ரூ.2 லட்சம்  திரும்ப கிடைக்காது என்ற நிபந்தனை உள்ளது.
    கல்விக் கட்டணம் எவ்வளவு,  அரசு இடஒதுக்கீடு எவ்வளவு என்ற குழப்பத்தில் புதுவை மாநில மாணவர்கள் மற்றும் பெற்றோர்கள் தவிக்கின்றனர்.  எனவே,  புதுவை அரசு,  கல்வி கட்டணம் எவ்வளவு,  அரசு இடஒதுக்கீடு எவ்வளவு என்று அறிவித்து,  தரவரிசைப் பட்டியலை உடனடியாக வெளியிட வேண்டும்.  எந்த தேதியில் தரவரிசைப் பட்டியல் வெளியிடப்படும் என்று  அரசு உடனடியாக அறிவிக்க வேண்டும் எனத் தெரிவித்துள்ளார்.
     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai