பாஜக உள்கட்டமைப்புத் தேர்தல்: புதிய நிர்வாகிகள் தேர்வு தீவிரம்

புதுவை மாநிலத்தில் பாஜக உள்கட்டமைப்புத் தேர்தல் நடத்தப்பட்டு, தொகுதிவாரியாக கிளைகளுக்கு புதிய நிர்வாகிகள் தேர்வு செய்யப்பட்டு வருகின்றனர்.

புதுவை மாநிலத்தில் பாஜக உள்கட்டமைப்புத் தேர்தல் நடத்தப்பட்டு, தொகுதிவாரியாக கிளைகளுக்கு புதிய நிர்வாகிகள் தேர்வு செய்யப்பட்டு வருகின்றனர்.
பாஜக உள்கட்டமைப்பு தேர்தல் நாடு முழுவதும் புதன்கிழமை தொடங்கியது. அதன்படி, புதுவையிலும் அந்தக் கட்சியின் உள்கட்டமைப்பு தேர்தல் பணிகளை பாஜகவினர் தொடங்கியுள்ளனர். 
புதுவையின் 4 பிராந்தியங்களிலும் உள்ள 970 கிளைகளுக்கான தேர்தல், அந்தந்த பொறுப்பாளர்கள் தலைமையில் நடைபெற்று வருகிறது. புதுச்சேரி லாசுப்பேட்டை சட்டப்பேரவைத் தொகுதியில் மாநில தேர்தல் அதிகாரி ஏம்பலம் ஆர்.செல்வம் கிளைத் தேர்தலை தொடக்கி வைத்தார். 
இதில், தொகுதி தேர்தல் அதிகாரி அசோக்பாபு, தேர்தல் பார்வையாளரான மாநிலத் தலைவர் வி. சாமிநாதன் எம்.எல்.ஏ., தொகுதித் தலைவர் முருகன், இணை தேர்தல் அதிகாரி சோமசுந்தரம் உள்ளிட்ட பலர் பங்கேற்றனர். இதில் 1, 2, 3 கிளைத் தலைவர்களாக முத்துராஜ், சுபாஷ், மாரிமுத்து ஆகியோர் தேர்வு செய்யப்பட்டனர். இதே போல, மணவெளி சட்டப்பேரவை தொகுதியில் உள்ள சின்ன வீராம்பட்டினம், ஓடைவெளி, மணவெளி, கட்டபொம்மன் நகர், தந்தை பெரியார் நகர், திருவள்ளுவர் வீதி, சிவலிங்கபுரம் ஆகிய 6 கிளைகளுக்கு தேர்தல் நடைபெற்றது. மாநில துணைத் தலைவர் ஏம்பலம் ஆர்.செல்வம் முன்னிலையில் நடைபெற்ற இந்தத் தேர்தலில், தேர்தல் அதிகாரி இந்திரன், மணவெளி தேர்தல் அதிகாரி லட்சுமி முருகானந்தம் ஆகியோர் வேட்பு மனுக்களைப் பெற்று தேர்தலை நடத்தினர். இதில் அனைத்து கிளை அமைப்புகளுக்கும் போட்டியின்றி தலைவர், செயலர், செயற்குழு உறுப்பினர் உள்ளிட்ட பொறுப்புகளுக்கு நிர்வாகிகள் தேர்ந்தெடுக்கப்பட்டனர்.
இதில் விவசாய அணி தேசிய உறுப்பினர் பாரதிமோகன், 
தொகுதித் தலைவர் லட்சுமிகாந்தன், பொதுச் செயலர்கள் கலைவாணன், சுகுமாறன், தொகுதிச் செயலர் இளஞ்செழியன் உள்ளிட்ட பலர் உடனிருந்தனர். இதேபோல அனைத்துத் தொகுதிகளிலும் உள்ள பாஜக கிளைகளுக்கு புதிய நிர்வாகிகள் தேர்வு விறுவிறுப்பாக நடைபெற்று வருகிறது. 

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
Dinamani
www.dinamani.com