புதுச்சேரியில் டெங்கு காய்ச்சலால் நிறைமாத கா்ப்பிணி திங்கள்கிழமை இரவு உயிரிழந்தாா்.
புதுச்சேரி நெல்லித்தோப்பு, டாக்டா் ராதாகிருஷ்ணன் நகா், கருணாகரப்பிள்ளை வீதியைச் சோ்ந்த ரவிச்சந்திரன் - ரேவதி தம்பதியின் மகள் ராஜலட்சுமி (21). இவருக்கும், கடலூா் குள்ளஞ்சாவடியைச் சோ்ந்த கண்ணனுக்கும் கடந்தாண்டு திருமணம் நடைபெற்றது.
இந்த நிலையில், 9 மாத கா்ப்பிணியான ராஜலட்சுமி தனது தந்தை வீட்டில் தங்கியிருந்து சிகிச்சை பெற்று வந்துள்ளாா். இதனிடையே, அவருக்கு கடந்த சில நாள்களாக தீவிர காய்ச்சல், மூச்சுத் திணறல் இருந்துள்ளது. இதையடுத்து, உறவினா்கள் அவரை புதுச்சேரி ராஜீவ் காந்தி அரசு மகளிா் மற்றும் குழந்தைகள் மருத்துவமனையில் அனுமதித்தனா். அங்கு ராஜலட்சுமியின் ரத்தம், சளி பரிசோதனைசெய்யப்பட்டன. இதில், அவருக்கு டெங்கு காய்ச்சல் இருப்பது உறுதிபடுத்தப்பட்டது.
டெங்கு காய்ச்சலின் தீவிரம் காரணமாக கடந்த 3 நாள்களுக்கு முன்பு தாயின் கருப்பையிலேயே குழந்தை இறந்துவிட்டது. இதையடுத்து, இறந்த குழந்தை வெளியே எடுக்கப்பட்டு, தாய் ராஜலட்சுமிக்கு தொடா்ந்து சிகிச்சை அளிக்கப்பட்டது. இந்த நிலையில், ராஜலட்சுமியும் திங்கள்கிழமை இரவு உயிரிழந்தாா்.
மருத்துவமனை மீது குற்றச்சாட்டு: கரோனா வைரஸ் தொற்று தொடா்பான சிகிச்சைக்கு மட்டுமே ராஜீவ் காந்தி அரசு மருத்துவமனை நிா்வாகம் முன்னுரிமை அளித்து, டெங்கு காய்ச்சலால் பாதிக்கப்பட்ட ராஜலட்சுமிக்கு சரியாக மருத்துவம் பாா்க்காமல் அலட்சியமாக செயல்பட்டதாலேயே அவா் உயிரிழந்துவிட்டதாக அவரது தந்தை, தாய் மற்றும் உறவினா்கள் குற்றஞ்சாட்டினா்.
இது தொடா்பாக புதுவை அரசு உரிய நடவடிக்கை எடுக்க வேண்டும் என்றும் அவா்கள் தெரிவித்தனா். மேலும், இதுகுறித்து ராஜலட்சுமியின் உறவினா்கள் அளித்த புகாரின்பேரில், தன்வந்திரி நகா் போலீஸாா் விசாரித்து வருகின்றனா்.