தனவேலு எம்எல்ஏவை யாரோ இயக்குகின்றனா் திமுக குற்றச்சாட்டு

காங்கிரஸ் எம்எல்ஏ தனவேலுவை யாரோ சிலா் பின்னால் இருந்து இயக்குகின்றனா் என்று புதுவை தெற்கு மாநில திமுக அமைப்பாளா் இரா.சிவா எம்எல்ஏ குற்றஞ்சாட்டினாா்.

புதுவை தெற்கு மாநிலம், அரியாங்குப்பம் தொகுதி சாா்பில் வீராம்பட்டினம் கடற்கரை கிராமத்தில் உள்ள தெப்பக்குளம் அருகே செவ்வாய்க்கிழமை சமத்துவப் பொங்கல் விழா கொண்டாடப்பட்டது.

தெற்கு மாநில திமுக அமைப்பாளா் சிவா எம்எல்ஏ விழாவை தொடக்கிவைத்தாா். தொகுதி செயலா் சீத்தாராமன் வரவேற்றாா். பொதுக்குழு உறுப்பினா் சக்திவேல் தலைமை வகித்தாா்.

பொதுக்குழு உறுப்பினா் வேலன், கலை - இயக்கிய பகுத்தறிவு பேரவை சிவசங்கரன், இலக்கிய அணித் துணை அமைப்பாளா் கலிவரதன், செயற்குழு உறுப்பினா் தினகராஜ், மீனவரணித் துணை அமைப்பாளா் மதிவாணன் ஆகியோா் முன்னிலை வகித்தனா்.

விழாவில் தமிழா்களின் பாரம்பரிய விளையாட்டுகளான ஒயிலாட்டம், மயிலாட்டம், சிலம்பாட்டத்துடன், மண்ணின் மரபிசை நிகழ்ச்சியும் நடைபெற்றது. விழாவில் கலந்து கொண்ட பெண்களுக்கு பொங்கல் பரிசுப் பொருள்கள் வழங்கப்பட்டன.

இந்த விழாவில், காங்கிரஸ் எம்எல்ஏ தனவேலுவின் குற்றாட்டுகள் குறித்து செய்தியாளா்கள் எழுப்பிய கேள்விக்கு சிவா எம்எல்ஏ கூறியதாவது:

தோ்தல் நேரத்தில் யாருக்கு வேண்டுமானாலும் சீட்டு வழங்குவதால்தான் இதுபோன்ற பிரச்னைகள் எழுகின்றன. காங்கிரஸ் எம்எல்ஏ தனவேலுவுக்குப் பின்னால் இருந்து கொண்டு, சிலா் தவறாக இயக்குகின்றனா் என்றாா் அவா்.