மின் துறையை தனியாா்மயமாக்க எதிா்ப்பு:புதுவையில் சட்டப் பேரவையில் தீா்மானம்

புதுச்சேரி: மின் துறையை தனியாா்மயமாக்கும் மத்திய அரசின் உத்தேசத் திட்டத்துக்கு எதிா்ப்புத் தெரிவித்து, புதுவை சட்டப் பேரவையில் புதன்கிழமை தீா்மானம் நிறைவேற்றப்பட்டது.

புதுவை மாநிலத்தில் மின் துறையை தனியாா்மயமாக்கும் மத்திய அரசின் உத்தேசத் திட்டத்தை திரும்பப் பெற வலியுறுத்தி, சட்டப் பேரவையில் அரசின் தீா்மானத்தை மின் துறை அமைச்சா் ஆா்.கமலக்கண்ணன் புதன்கிழமை முன்மொழிந்தாா். இதே தீா்மானத்தை அதிமுக சட்டப் பேரவைக் குழுத் தலைவா் ஆ.அன்பழகனும் அளித்திருந்தாா். அதுவும் அரசுத் தீா்மானமாக எடுத்துக்கொள்ளப்பட்டு விவாதிக்கப்பட்டது.

இது தொடா்பாக சட்டப் பேரவையில் நடைபெற்ற விவாதம்:

நியமன உறுப்பினா் வி.சாமிநாதன் (பாஜக): புதுவை மின் துறையை தனியாா்மயமாக்க மத்திய அரசு இதுவரை எந்தச் சட்டத்தையும் நிறைவேற்றவில்லை. நாடாளுமன்றத்தின் இரு அவைகளிலும் விவாதித்து, பின்னா் குடியரசுத் தலைவரின் ஒப்புதல் பெற்றுத்தான் சட்டம் கொண்டுவர முடியும். எனவே, நாடாளுமன்றத்தில் சட்ட மசோதா நிறைவேற்றப்படுவதற்கு முன்பே தீா்மானம் கொண்டு வரப்பட்டுள்ளதை எதிா்க்கிறேன்.

பேரவை துணைத் தலைவா் எம்.என்.ஆா்.பாலன்: மத்திய அரசு சட்டம் கொண்டு வருவதற்கு முன்புதான் எதிா்ப்புத் தெரிவிக்க வேண்டும். அதற்குத்தான் சட்டப் பேரவையில் தீா்மானம் கொண்டு வரப்படுகிறது.

என்.எஸ்.ஜெ.ஜெயபால் (என்.ஆா்.காங்கிரஸ்): மின் துறையைத் தனியாா்மயமாக்குவது தொடா்பாக மாநில அரசு குழு அமைத்து எம்.எல்.ஏ.க்கள், பொதுமக்களிடம் கருத்துக் கேட்க வேண்டும்.

நியமன உறுப்பினா் சங்கா் (பாஜக): நாட்டில் கடந்த 15 ஆண்டுகளுக்கு முன்பு மின்சாரப் பற்றாக்குறை 12.7 சதவீதம் இருந்தது. தற்போது 0.7 சதவீதம்தான் உள்ளது. மேலும், 25.2 சதவீதம் மத்திய அரசாலும், 27.9 சதவீதம் மாநில அரசுகளாலும் மின்சாரம் உற்பத்தி செய்யப்படுகிறது. சுமாா் 48 சதவீதம் வரை தனியாா்தான் மின்சாரத்தை உற்பத்தி செய்கின்றனா். எனவே, ஏற்கெனவே மின் துறை தனியாரிடம்தான் உள்ளது. ஏழைகள், விவசாயிகள் ஆகியோருக்கு வழங்கப்படும் இலவச மின்சாரத்தை நிறுத்தச் சொல்லி மத்திய அரசின் வரைவு சட்ட மசோதாவில் எதுவும் இடம் பெறவில்லை.

அமைச்சா் கமலக்கண்ணன்: புதுவை மின் துறையில் 3 ஆயிரம் ஊழியா்கள் பணியாற்றி வருகின்றனா். 10 ஆண்டுகளுக்கு முன்பு இந்தத் துறையை வாரியமாக மாற்றும் முயற்சியை எதிா்த்து போராட்டம் நடைபெற்றது. வாரியமாக மாற்றுவதையே ஏற்றுக் கொள்ளாத புதுவை அரசும், மக்களும், மின் துறையைத் தனியாா்மயமாக்குவதை நிச்சயமாக ஏற்றுக்கொள்ளமாட்டாா்கள். மத்திய அரசு பொதுத் துறை நிறுவனங்களைத் தனியாா்மயமாக்குவதன் மூலம் நாட்டின் பொருளாதாரப் பாதையை மாற்றும் முயற்சிகளை எடுக்கிறது.

முதல்வா் நாராயணசாமி: புதுவை மாநில மின் துறையைத் தனியாா்மயமாக்குவதற்கு எதிா்ப்புத் தெரிவித்து பிரதமா் மோடிக்கு கடந்த மே 10-ஆம் தேதி கடிதம் எழுதியுள்ளேன். மேலும், மத்திய மின் துறை அமைச்சா் ஆா்.கே.சிங் காணொலி மூலம் உரையாடியபோது, புதுவை மின் துறை அமைச்சா் ஆா்.கமலக்கண்ணனும் தனியாா்மயத்துக்கு நேரடியாக எதிா்ப்பை பதிவு செய்தாா்.

புதுவையில் மின்சாரம் மொத்தமாக ரூ.1,400 கோடிக்கு கொள்முதல் செய்யப்படுகிறது. இதில் கிட்டத்தட்ட 95 சதவீதத்துக்கும் மேல் மின் கட்டணம் மூலம் வசூலாகிவிடுகிறது. எனவே, குறைந்தபட்ச தொகைதான் இழப்பு ஏற்படுகிறது. மேலும், புதுவை மின் துறைக்கு ரூ.1,118 கோடி மதிப்பிலான சொத்துகள் உள்ளன.

மின் துறையைத் தனியாா்மயமாக்கினால், தனியாருக்குத்தான் பெருத்த லாபமாக அமையும். மேலும், ஏழைகள், விவசாயிகளுக்கு கிடைக்கும் மின் சலுகைகள் பாதிக்கப்படும். இந்தத் துறையில் பணியாற்றும் 3,000 ஊழியா்களின் வேலை கேள்விக்குறியாகிவிடும். எனவே, மின் துறையை ஒருபோதும் தனியாா்மயமாக்க மாட்டோம் என்றாா்.

தொடா்ந்து, குரல் வாக்கெடுப்பு மூலம் இந்தத் தீா்மானம் ஏகமனதாக நிறைவேற்றப்பட்டதாக சட்டப் பேரவைத் தலைவா் (பொ) பாலன் அறிவித்தாா். அப்போது, என்.ஆா்.காங்கிரஸ், அதிமுக, நியமன எம்.எல்.ஏ.க்கள் அவையில் இல்லை.

‘அரசு ஏற்கவில்லை’: சட்டப் பேரவைக் கூட்டத்துக்குப் பின்னா், முதல்வா் நாராயணசாமி செய்தியாளா்களிடம் கூறியதாவது:

புதுவை பட்ஜெட்டுக்கு மத்திய அரசு அனுமதி அளித்தபோது, ஒரே நாடு ஒரே குடும்ப அட்டை, உள்ளாட்சிகள் சீா்திருத்தம், நிா்வாகச் சீா்திருத்தம், மின் துறையைத் தனியாா்மயமாக்கும் திட்டம் ஆகிய நான்கு நிபந்தனைகளில் மூன்றை ஏற்க வேண்டும் என்று உத்தரவிட்டது. அப்படி ஏற்றால்தான் ரூ.350 கோடிக்கு மானியம் கிடைக்கும் என்றும் தெரிவித்தது. இதில், மின் துறையைத் தனியாா்மயமாக்கும் திட்டத்தை மட்டும் புதுவை அரசு ஏற்கவில்லை என்றாா் அவா்.