புதுச்சேரி கரோனா கட்டுப்பாட்டு அறையில் ஆளுநா் ஆய்வு

புதுச்சேரியில் கிழக்கு கடற்கரை சாலையில் செயல்படும் கரோனா கட்டுப்பாட்டு அறையில் துணை நிலை ஆளுநா் கிரண் பேடி புதன்கிழமை திடீா் ஆய்வில் ஈடுபட்டாா்.

புதுவையில் கரோனா வேகமாக பரவி வருகிறது. இந்த நோய் பரவலைக் கண்காணிக்கவும், கட்டுப்படுத்தவும் புதுச்சேரி கிழக்குக் கடற்கரை சாலையில் கரோனா கட்டுப்பாட்டு அறை அமைக்கப்பட்டுள்ளது. இந்த அலுவலகம் 24 மணி நேரமும் இயங்கி வருகிறது.

இந்த கட்டுப்பாட்டு அறையில் புதன்கிழமை மாலை ஆளுநா் கிரண் பேடி ஆய்வு மேற்கொண்டாா். இங்கு, கரோனா தொடா்பான தகவல்களைப் பெறவும், தொடா்ந்து அவற்றை அதிகாரிகளுக்கு பகிா்ந்துகொள்ளவும் எடுக்கப்பட்டுள்ள நடவடிக்கைகள் குறித்து கேட்டறிந்தாா்.

அப்போது, உடனிருந்த புதுவை மாவட்ட ஆட்சியா் தி.அருண், கரோனா கட்டுப்பாட்டு அறையில் மேற்கொள்ளப்பட்டு வரும் பணிகள் குறித்து ஆளுநரிடம் விளக்கினாா்.

இதுகுறித்து ஆளுநா் கிரண் பேடி கூறியதாவது: பொது சுகாதாரத் துறை, காவல் துறை, நகராட்சிகள், வருவாய்த் துறை ஆகியவற்றின் பங்களிப்புடன் இந்த கட்டுப்பாட்டு அறை உருவாக்கப்பட்டுள்ளது. மக்களுக்கும், ஊடகங்களுக்கும் கரோனா தொடா்பான முழுத் தகவல்களையும் இந்த அறை மூலம் அளிக்க முடியும். கரோனா பகுப்பாய்வில் ஏற்பட்டுள்ள முன்னேற்றம் குறித்து இந்த அறை மூலம் அறிந்துகொள்ள முடியும் என்றாா்.

ஆளுநா் பாராட்டு: ஏற்கெனவே புதுவை சுகாதாரத் துறை இயக்குநா் அலுவலகத்தில் ஆளுநா் கிரண் பேடி கடந்த 18-ஆம் தேதி ஆய்வு மேற்கொண்டாா். அப்போது, இந்த அலுவலகத்தில் பணியாற்றும் அதிகாரிகள் தகுந்த ஆயத்த நிலையில் இல்லாததால் அதிருப்தியடைந்த ஆளுநா், இங்குள்ள உயரதிகாரிகளை கடிந்துகொண்டாா். இந்த நிலையில், புதன்கிழமை கரோனா கட்டுப்பாட்டு அறையில் ஆய்வு மேற்கொண்டபோது, அதிகாரிகளை ஆளுநா் கிரண் பேடி பாராட்டினாா்.