புதுவை மாநிலம், மாஹே பிராந்தியத்தில் மூதாட்டிக்கு கரோனா வைரஸ் பாதிப்பு உறுதிப்படுத்தப்பட்டுள்ள நிலையில், அவருக்கு தீவிர சிகிச்சை அளிக்கப்பட்டு வருகிறது.
புதுவை மாநிலத்தில் சுகாதாரத் துறை சாா்பிலும், பிற துறைகள் சாா்பிலும் கரோனா பரவலைத் தடுக்கும் விதமாக பல்வேறு முன்னெச்சரிக்கை நடவடிக்கைகள் எடுக்கப்பட்டு வருகின்றன.
இதனிடையே, கரோனா வைரஸ் அறிகுறிகள் காரணமாக புதுச்சேரி ஜிப்மா், கோரிமேடு மாா்பக மருத்துவமனை, காலாப்பட்டில் உள்ள தனியாா் மருத்துவமனைகளில் கடந்த வாரம் 3 போ் சிகிச்சைக்காக சோ்க்கப்பட்டனா். இவா்களது ரத்த மாதிரிகள் பரிசோதிக்கப்பட்டதில் யாருக்கும் கரோனா பாதிப்பு இல்லை எனத் தெரிய வந்தது.
இவா்களில் ஒருவா் சிகிச்சை முடிந்து வீட்டுக்கு சென்றுவிட, மீதம் 2 போ் மருத்துவமனைகளிலேயே கண்காணிப்பில் வைக்கப்பட்டுள்ளனா்.
மாஹே பிராந்தியத்தில் காய்ச்சலால் பாதிக்கப்பட்டு மருத்துவமனையில் சோ்க்கப்பட்ட மூதாட்டிக்கு கரோனா பாதிப்பு உறுதிப்படுத்தப்பட்டுள்ளது.
இதுகுறித்து புதுவை சுகாதாரத் துறை இயக்குநா் எஸ்.மோகன்குமாா் செய்தியாளா்களிடம் கூறியதாவது:
புதுவை மாநிலம், மாஹே பிராந்தியம், பள்ளூா் பகுதியைச் சோ்ந்த 68 வயது மூதாட்டி புனிதப் பயணமாக சவூதி அரேபியாவுக்குச் சென்றுவிட்டு, அபுதாபி வழியாக மாஹேவுக்கு கடந்த சில வாரங்களுக்கு முன்பு திரும்பியுள்ளாா். மாஹேவுக்கு வந்தது முதல் அவருக்கு தொடா்ந்து இருமல், மூச்சுத்திணறல், காய்ச்சல் இருந்துள்ளது.
இதற்காக தனியாா் மருத்துவமனைகளில் சிகிச்சை பெற்ற அவா், மாஹே அரசு மருத்துவமனையில் தீவிர சிகிச்சைக்காக கடந்த வாரம் அனுமதிக்கப்பட்டாா். அவரது ரத்தம், சளி, தொண்டை திசு மாதிரிகள் பரிசோதனைக்காக கோழிக்கோடு மருத்துவமனை ஆய்வகத்துக்கு அனுப்பி வைக்கப்பட்டன.
பரிசோதனை முடிவுகளில், அந்த மூதாட்டிக்கு கரோனா பாதிப்பு இருப்பது உறுதிப்படுத்தப்பட்டுள்ளது. இதையடுத்து, அந்த மூதாட்டிக்கு மாஹே அரசு மருத்துவமனையில் தொடா்ந்து சிகிச்சை அளிக்கப்பட்டு வருகிறது என்றாா் அவா்.