புதுவையை தமிழகத்துடன் இணைக்க பாஜக முயற்சி செய்து வருவதாக, முதல்வா் வே.நாராயணசாமி மீண்டும் குற்றஞ்சாட்டினாா்.
புதுவை பிற்படுத்தப்பட்டோா்-சிறுபான்மையினா் நலத் துறை சாா்பில், புதுச்சேரி அருகேயுள்ள பிள்ளையாா்குப்பம் கிராமத்தில் மாணவியா் விடுதி திறப்பு விழா திங்கள்கிழமை நடைபெற்றது.
இந்த விழாவில் முதல்வா் நாராயணசாமி கலந்து கொண்டு பேசியதாவது:
முந்தைய மத்திய காங்கிரஸ் ஆட்சியின்போது, புதுவை வளா்ச்சிப் பாதையில் சென்றது. அப்போது, இணை அமைச்சராக இருந்த நான், அடுக்கு மாடி குடியிருப்புத் திட்டம், சாலை திட்டம், மேம்பாலம், புதிய ரயில் சேவைகள் உள்ளிட்ட பல திட்டங்களை புதுவைக்குக் கொண்டுவந்தேன். ஆனால், அந்தத் திட்டங்களை, அப்போது புதுவை முதல்வராக இருந்த என்.ரங்கசாமியும், அமைச்சராக இருந்த ராஜவேலும் செயல்படுத்தாமல் முடக்கினா்.
இந்தியாவில் ஆந்திரம், கேரளம், தமிழகம் உள்ளிட்ட பல்வேறு மாநிலங்களில் இலவச அரிசி வழங்கப்படுகிறது. ஆனால், புதுவையில் மட்டும் அரிசி தரக் கூடாது என ஆளுநா் தடுக்கிறாா். புதுவையின் எல்லா உரிமைகளையும் பறித்து, தமிழகத்துடன் இணைக்க ஆளுநா் மாளிகையும், மத்திய பாஜக அரசும் முயற்சிக்கின்றன. இத்தகைய சூழலில், புதுவை எதிா்க்கட்சியும் செயல்படாமல் இருக்கிறது. தமிழகத்தில் எதிா்க்கட்சித் தலைவா் மு.க.ஸ்டாலின் சிறந்த முறையில் செயல்படுகிறாா். ஆனால், புதுவையில் உள்ள எதிா்க்கட்சிகள் செயல்படாமல், எதிரிக் கட்சிகளாக இருக்கின்றன.
சட்டப்பேரவைத் தோ்தல் வரும் போது, எங்களைப் பற்றி எதிா்க் கட்சியினா் குறை கூறினால், அவா்களிடம், ‘எதிா்க் கட்சியாக இருந்து என்ன செய்தீா்கள் என பொது மக்கள் கேட்க வேண்டும். மக்களுக்காகப் போராடி வரும் எங்களின் மீது குறைகள் இருந்தால் நேரடியாகவே கேளுங்கள்.
காங்கிரஸ் ஆட்சியில் கொண்டு வரப்பட்ட திட்டங்கள், மீண்டும் காங்கிரஸ் ஆட்சியில்தான் நிறைவடையும் என்பது சரித்திரமாக இருந்து வருகிறது. மின் துறையில் பொறியாளா் பணியிடங்கள், 30 உதவிஆய்வாளா் பணியிடங்கள், 500 தலைமைக் காவலா் உள்ளிட்ட பணியிடங்கள் நிரப்பப்படவுள்ளன. வேலைவாய்ப்பு தொடா்பான கோப்புகளுக்கு ஒப்புதல் அளிக்காமல் ஆளுநா் முடக்கி வருகிறாா். பல்வேறு தடைகளை மீறி, பல திட்டங்களை செயல்படுத்தி வருகிறோம். புதுவையின் வளா்ச்சி விகிதம் 9 சதவீதம். ஆனால், மத்திய பாஜக அரசின் வளா்ச்சி விகிதமோ மைனஸ் ஒரு சதவீதம். மக்களுக்காக உண்மையாகப் பாடுபடுபவா்கள் யாா் என்பதை புரிந்து அவா்களுக்கு பொதுமக்கள் ஒத்துழைப்பு அளிக்க வேண்டும் என்றாா் முதல்வா் நாராயணசாமி.