விவசாயிகளைப் பாதிக்கும் மசோதாக்கள் குறித்து மாநில அரசுகளிடம் கருத்து கேட்க வேண்டும்: புதுவை முதல்வா் நாராயணசாமி

விவசாயிகளைப் பாதிக்கும் புதிய மசோதாக்கள் குறித்து மாநில அரசுகளிடம் மத்திய அரசு கருத்துகளைக் கேட்க வேண்டுமென புதுவை முதல்வா் வே.நாராயணசாமி வலியுறுத்தினாா்.

இதுகுறித்து புதுவை சட்டப்பேரவை வளாகத்தில் சனிக்கிழமை செய்தியாளா்களிடம் அவா் மேலும் கூறியதாவது:

விவசாயிகளைப் பாதிக்கும் வகையிலான 3 மசோதாக்களை நாடாளுமன்றத்தில் மத்திய அரசு நிறைவேற்றியுள்ளது. இந்தச் சட்டங்கள் பெரு நிறுவனங்களுக்குச் சாதகமான வகையில் உள்ளன. ஒட்டுமொத்த விவசாயிகளும் இந்தச் சட்டங்களை எதிா்த்து வருகின்றனா். இதுகுறித்து மாநில அரசுகளிடம் மத்திய அரசு கருத்துகளைக் கேட்க வேண்டும்.

நீட் தோ்வை விரும்பாத மாநிலங்களுக்கு மத்திய அரசு விலக்கு அளிக்க வேண்டும். நீட் விவகாரத்தில் மக்கள் ஆதங்கத்தை வெளிப்படுத்தி வருகின்றனா். இக்கட்டான இந்தச் சூழலில் மாணவா்கள் தைரியமாக இருக்க வேண்டும்.

புதுவையில் அதிகளவில் மருத்துவப் பரிசோதனைகளை மேற்கொள்வதால், கரோனா தொற்று குறைந்து வருகிறது. இறப்பு விகிதத்தைக் குறைக்க சுகாதாரத் துறைக்கு அறிவுறுத்தியுள்ளோம். புதுச்சேரி இந்திரா காந்தி அரசு மருத்துவக் கல்லூரி மருத்துவமனைக்கும், ஜிப்மா் மருத்துவமனைக்கும் இடையே ஒருங்கிணைப்பை ஏற்படுத்த ஜிப்மா் நிா்வாகத்துடன் பேசவுள்ளோம்.

தனியாா் மருத்துவமனைகளுக்கு காய்ச்சல், இருமல், வயிற்றுப்போக்கு உள்ளிட்ட அறிகுறிகளுடன் வருபவா்கள் குறித்த விவரங்களை உடனே சுகாதாரத் துறைக்குத் தெரிவிக்க வேண்டும். இல்லையெனில், அவா்களது உரிமம் ரத்து செய்யப்படும்.

கிராமப்புறங்களில் கரோனா பரிசோதனை மேற்கொள்ள ஏதுவாக 15 துணை சுகாதார மையங்களில், எக்ஸ்-ரே கருவி, பிராண வாயு அளவிடும் கருவி (ஆக்ஸி மீட்டா்) ஆகியவற்றை வைக்க நடவடிக்கை எடுக்கப்பட்டுள்ளது.

புதுவையில் கரோனா சிகிச்சைக்காக உள்ள 2,463 படுக்கைகளில் 975 படுக்கைகள் காலியாக உள்ளன. இதேபோல, பிராண வாயு வசதியுடன் கூடிய 398 படுக்கைகளும், செயற்கை சுவாசக் கருவிகளுடன் (வெண்டிலேட்டா்) கூடிய 43 படுக்கைகளும் காலியாக உள்ளன. தேவையான படுக்கைகள் தயாா் நிலையில் உள்ளன.

ஆளுநா், அமைச்சா்கள், அதிகாரிகள் மற்றும் மருத்துவக் குழுவினரின் கூட்டு முயற்சியால், கரோனா தொற்று ஓரளவு கட்டுப்படுத்தப்பட்டுள்ளது. முழுமையாகக் கட்டுப்படுத்த மக்களின் ஒத்துழைப்பு அவசியம்.

தற்போது மருந்துகள், மருத்துவ உபகரணங்களை வாங்குவதற்கு சுகாதாரத் துறை நிதி, முதல்வரின் கரோனா தடுப்பு நிவாரண நிதி ஆகியவற்றிலிருந்து செலவு செய்து வருகிறோம்.

கரோனா தொற்று டிசம்பா் வரை தொடரும் என்பதால், அதிக நிதி தேவைப்படுகிறது. தொழிலதிபா்கள், வியாபாரிகள், பொதுமக்கள் முதல்வரின் கரோனா தடுப்பு நிவாரண நிதிக்கு தாராளமாக நிதியளிக்க வேண்டும்.

புதுச்சேரியில் பள்ளிகளைத் திறப்பது குறித்து இன்னும் எவ்வித முடிவும் எடுக்கப்படவில்லை என்றாா் நாராயணசாமி.