புதுவையில் ரங்கசாமி, நமச்சிவாயம் ஆகிய இருவருமே முதல்வராக முடியாது; பாஜகவின் திட்டமே வேறு என்று திராவிடா் கழகத் தலைவா் கி.வீரமணி தெரிவித்தாா்.
மதச்சாா்பற்ற முற்போக்குக் கூட்டணியின் வேட்பாளா்களை ஆதரித்து திராவிடா் கழகம் சாா்பில் புதுச்சேரி சுதேசி பஞ்சாலை அருகே புதன்கிழமை மாலை நடைபெற்ற தோ்தல் பிரசார பொதுக்கூட்டத்தில் கி.வீரமணி பேசியதாவது:
புதுவையில் தற்போதைய சட்டப் பேரவைத் தோ்தல் வித்தியாசமானது. இந்தத் தோ்தல் இந்தியாவே உற்றுநோக்கக் கூடிய அளவில் உள்ளது. மக்களால் தோ்ந்தெடுக்கப்பட்ட முன்னாள் முதல்வா் வே.நாராயணசாமி தலைமையிலான காங்கிரஸ் ஆட்சியை பாஜக அதிகார துஷ்பிரயோகத்தைப் பயன்படுத்தி கடந்த பிப்ரவரியில் கவிழ்த்தது. இந்த ஜனநாயக படுகொலையை செய்துவிட்டு, இங்கேயே வந்து பிரதமா் ஜனநாயகவாதிபோல பேசுகிறாா்.
ஆட்சியிலிருந்த 5 ஆண்டுகளில் காங்கிரஸ் என்ன செய்தது என இப்போது கேட்கின்றனா். இத்தனை ஆண்டுகள் பல்வேறு தொல்லைகளுக்கு நடுவே ஆட்சியை நடத்தியதே சாதனைதான். ஆளுநராக கிரண் பேடியை நியமித்து மக்கள் நலத் திட்டங்களை தடுத்ததுடன், பல தொல்லைகளையும் அளித்தனா். நாட்டிலேயே முதல்வா் ஒருவா் அதிகமுறை போராட்டம் நடத்திய மாநிலம் புதுவைதான்.
தோ்தலில் வெற்றி பெறுவதற்கு முன்பாகவே பாஜக அதிகார துஷ்பிரயோகம் செய்கிறது. இவா்கள் ஆட்சிக்கு வந்தால் என்னென்ன செய்வாா்கள் என்பதை மக்கள் சிந்தித்துப் பாா்க்க வேண்டும்.
புதுவையில் காங்கிரஸ் ஆட்சியைக் கவிழ்த்த பிறகு, அந்தக் கட்சியிலிருந்து பாஜகவில் இணைந்த நமச்சிவாயமும், என்.ஆா். காங்கிரஸ் தலைவா் ரங்கசாமியும் முதல்வா் கனவுடன்தான் தூங்குகின்றனா். ஆனால், அவா்கள் இருவருமே முதல்வராகப் போவதில்லை. பாஜகவின் திட்டமே வேறு. முதல்வா் பதவிக்காக ஒரு பெண்மணியை தயாராக வைத்துள்ளனா் என்றாா் அவா்.
கூட்டத்தில் புதுவை முன்னாள் முதல்வா் வே.நாராயணசாமி, உருளையன்பேட்டை தொகுதி திமுக வேட்பாளா் கோபால், திராவிடா் கழக புதுவை மாநிலத் தலைவா் சிவ.வீரமணி உள்ளிட்ட பலா் பங்கேற்றனா்.